तस्करबाट बरामद गरिएको ६० किलो सुनको गुणस्तर उच्च

३ भदौ, काठमाडौं । त्रिभुवन विमानस्थलबाहिर बरामद गरिएको सुन एक नम्बरको भएको पाइएको छ । तस्करले हङकङबाट भित्र्याएको ब्रेक शुबाट बरामद गरिएको सुनको गुणस्तर सबैभन्दा उत्कृष्ट ठहरिएको हो । नेपाल राष्ट्र बैंक टक्सार महाशाखाले गुणस्तर परीक्षण गर्दा उक्त सुन ९९९ प्रतिशत शुद्ध रहेको पुष्टि भएको हो । सामान्यतया बजारमा २२ क्यारेट र २४ क्यारेट भनेर सुनको गुणस्तर वर्गीकरण गरिन्छ ।

राष्ट्र बैंकले नम्बरका आधारमा सुनको गुणस्तर हेर्ने गर्छ । जसअनुसार ९९९ भनेको सबैभन्दा उच्च गुणस्तरको सुन हो । नेपालमा यति शुद्ध गुणस्तरको सुन धेरै कम रहेको राष्ट्र बैंक बताएको छ । नेपाल राष्ट्र बैंकलाई सुनको सिक्का (असर्फी) का लागि सबैभन्दा उच्च गुणस्तरको सुन चाहिन्छ । यसकारण सरकारको अनुमति पाएमा कानुन अनुसार उक्त सुन आफैंले खरिद गर्न तयार रहेको राष्ट्र बैंकले बताएको छ ।

तस्करबाट बरामद भएको सुन गत साता टक्सार महाशाखाले गालेको थियो । ब्रेक शुबाट निकाल्दा सुनको परिमाण ६० किलो ७८९ ग्राम कायम भएकोमा त्यसलाई गाल्दा घटेर ६० किलो ७१६ ग्राम कायम भएको छ । सुन गालेर ’बिस्कुट’ बनाएपछि राष्ट्र बैंकले सुनको गुणस्तर मापन गर्दा सबैभन्दा उच्च गुणस्तरको भेटिएको हो ।