बिहान कार्यव्यवस्थाको बैठक बोलाएर काठमाडौं उडिन् उपसभामुख दनुवार, विश्वासको मत अनिश्चित

४ भदौ, विराटनगर । कोशी प्रदेशकी उपसभामुख सिर्जना दनुवार काठमाडौं भागेकी छन् । बिहान प्रदेशसभाको कार्य व्यवस्था परामर्श समितिको बैठक बोलाएर उनी काठमाडौं लागेकी हुन् । उपसभामुख सिर्जना दनुवार सोमबार बिहान काठमाडौं लागेपछि  बैठक अनिश्चय भएको छ । 

मुख्यमन्त्री उद्धव थापाले विश्वासको मत लिन सूचना दर्ता गराएपछि उपसभामुख दनुवारले सोमबारलाई बैठक बोलाएकी थिइन् ।  तर, उनी आज बिहान हवाई मार्गबाट काठमाडौंतर्फ लागेकी हुन् । उनी आफ्नो निजी सुरक्षाकर्मीसहित दनुवार काठमाडौं उडेकी हुन् । कोशी प्रदेशका मुख्यमन्त्री उद्धव थापाले प्रदेशसभाबाट विश्वासको मत लिने प्रयोजनका लागि संसद बैठक बोलाएकै दिन उपसभामुख सिर्जना दनुवार काठमाडौं गएपछि प्रदेशसभा अलपत्र परेको छ । 

आज दिउँसो १ बजेका लागि तय भएको प्रदेशसभा बैठकबारे छलफल गर्न बिहान ८ बजे कार्य व्यवस्था परामर्श समितिको बैठक बोलाएर उपसभामुख दनुवार काठमाडौं गएकी हुन् । दनुवार उपचारको बहाना बनाएर काठमाडौं गएको गठबन्धन दलको आरोप छ । उनी विराटनगरबाट बिहान साढे ८ बजे यति एयरलाइन्सको विमानमा काठमाडौं गएको विराटनगर विमानस्थल स्रोतले जानकारी दिएको छ ।

उपसभामुख दनुवार प्रदेशसभा बैठकको अध्यक्षता नगरी बिरामी बिदा लिएर काठमाडौं हिँडेपछि सत्तारूढ गठबन्धनको बैठक बसको छ । मुख्यमन्त्री थापाले प्रमुख प्रतिपक्षी दल एमाले संसदीय दललाई विश्वासको मत दिनका लागि पत्राचार गरेर आइतबार आग्रह गरेका छन् । प्रतिपक्षी दल राप्रपाका प्रमुख सचेतक अमरबहादुर विष्टले विश्वासको मत लिने बैठक राप्रपाले बहिष्कार गर्ने निर्णय गरेको बताए । उनले विश्वासको मत लिने बैठकमा राप्रपा उपस्थित नहुने सुनाए ।

उपसभामुख दनुवार वा प्रतिपक्षी दलले प्रदेशसभाको अध्यक्षता गरिदिने अवस्थामा मात्रै मुख्यमन्त्री थापाले विश्वासको मत प्राप्त गर्नसक्ने अंक गणितीय जटिलताले सत्ता र प्रतिपक्ष दुवै आ–आफनै सत्ता स्वार्थको राजनीतिक दाउपेचमा लागेका हुन् ।

९३ सदस्यीय प्रदेशसभामा सत्तारुढ गठबन्धन दल कांग्रेसका २९, माओवादी केन्द्रका १३, एकीकृत समाजवादीका ४ र जनता समाजवादी पार्टीका १ गरी ४७ छन् । प्रमुख प्रतिपक्षी एमालेका उपसभामुखसहित ४० र राप्रपाका ६ गरी प्रतिपक्षमा ४६ प्रदेश सांसद छन् । प्रदेशसभामा विश्वासको मत लिन ४७ सदस्यको समर्थन आवश्यक छ ।

सत्तारुढ गठबन्धन दलसँग बहुमत ४७ सदस्य पनि छन् तर त्यो बहुमत उपसभामुख दनुवार वा एमाले र राप्रपाका अध्यक्ष मण्डलका सदस्य र ज्येष्ठ सदस्यले प्रदेशसभा बैठकको अध्यक्षता गरिदिने अवस्थामा मात्रै कायम रहने जटिलता छ ।