कागखोलामा फेरि बाढी, कागबेनी बजारमा त्रास

४ भदौ, काठमाडौं । भारी वर्षासँगै मुस्ताङको कागखोलामा फेरि भेलबाढी आएको छ । जिल्लाको वारागुङ गाउँपालिकाको माथिल्लो भेगमा पानी पर्दा कागखोलाको सहायक झोङ र मुक्तिनाथबाट बगेर आउने खोलामा बाढी आएको हो । 

वारागुङ गाउँपालिका–२ का वडाध्यक्ष न्होरू गुरूङले आइतबार राति मुक्ति क्षेत्र र झोङमा मध्यम वर्षा भएको बताएका छन् । कागखोलामा मिसिने झोङ र मुक्तिनाथ खोलामा बाढी आएको र उपल्लो मुस्ताङ जोड्ने सडकमा क्षति पुर्‍याएको प्रजिअ अनुप केसीले बताएका छन् । उद्धार टोली तयारी अवस्थामा रहेको उनले बताए ।

यसबाट तल्लो भेगमा रहेको मुख्य बजार कागबेनीमा स्थानीयमा त्रास फैलिएको छ । स्थानीयलाई सुरक्षित स्थानमा राखिएको प्रजिअ केसीले भने । मुस्ताङको जोमसोम स्टेसनमा पछिल्लो २४ घन्टामा ६.६ मिलिमिटर वर्षा मापन भएको जल तथा मौसम विज्ञान विभागको मौसम पूर्वानुमान महाशाखाले जनाएको छ । 

गत हप्ता यसै कागखोलामा आएको बाढीले कागबेनी बजारका अधिकांश घर र टहरा बगाएको थियो । यसबाट करोडौंको क्षति पुगेको स्थानीयले बताएका छन् । उनीहरु अहिले पनि बाढीले बगाएका घर, सरकारी भवनको अवशेष खोजी गरिरहेका छन् । आइतबार लेदो पन्छाउने क्रममा प्रभु बैंक र नेपाल इन्भेष्ट मेगा बैंकका गरी १ करोड ६५ लाख रुपैयाँ नगद लकरमा फेला परेको थियो । 

बाढीग्रस्त बनेका खानेपानी र बिजुली लाइन पनि सुचारु भइसकेको छ । तर, वर्षा दोहोरिरहने घटनाले बस्तीमा त्रास हटन सकेको छैन । उनीहरुले आफ्ना घरका सरसामन लिएर सुरक्षित स्थानमा गएका छन् ।