मुख्यमन्त्री थापाले आजै विश्वासको मत लिने

४ भदौ, काठमाडौं । कोशी प्रदेशका मुख्यमन्त्री उद्दव थापाले आजै प्रदेशसभा बैठकमा विश्वासको मत लिने भएका छन् । सरकार साझेदार दलहरुको बैठकले थापाले आजकै बैठकबाट विश्वासको मत लिने निर्णय गरेको हो ।

उपसभामुख सिर्जना दनुवार बैठक संचालन गर्न उपस्थित नहुने भएपछि सत्ता गठबन्धनको बैठक बसेको थियो । बैठकपछि सरकारका दोस्रो घटक माओवादी केन्द्र संसदीय दलका नेता ईन्द्रबहादुर आङ्बोले मुख्यमन्त्री थापाले आजै विश्वासको मत लिने निर्णय भएको बताए ।

विश्वासको मत लिने बैठक प्रभावित तुल्याउने उद्देश्यले उपसभामुख दनुवार पत्र लेखेर प्रदेशबाहिर हिँडेको आरोप सत्ता पक्षका सांसदहरुले लगाएका छन् । दनुवारले द्वन्द्व निम्त्याउन खाेजेकाे उनीहरूकाे भनाइ छ । एमालेकी दनुवार अघिल्लाे गठबन्धनबाट उपसभामुख निर्वाचित भएकी थिइन् । सभामुख पद यसअघि नै रिक्त अवस्थामा छ । 

उनले बैठककाे अध्यक्षताकाे जिम्मेवारी अध्यक्ष मण्डलका सदस्य स्माइल मन्सुरीलाइ ताेकेर आज बिहान प्रदेश छाडेकी छिन् ।

यो पनि पढ्नुहोस