अध्यादेशबाट अर्को बजेट ल्याउने तयारीमा कोशी  प्रदेश सरकार

७ भदौ, काठमाडौं । कोशी प्रदेश सरकारले अध्यादेशबाट बजेट ल्याउने तयारी गरेको छ । चालु अधिवेशन बिहीबारबाट अन्त्य गरिएको छ । प्रदेशसभा बन्द रहेको अवस्थामा बजेट ल्याउन अध्यादेशको साहरा लिने तयारीमा सरकार लागेको हो ।

भदौ १० र ११ गतेभित्र अध्यादेशबाट बजेट आउने कोशी प्रदेशका आर्थिक मामिला तथा योजना मन्त्री बाबुराम गौतमले बताए । यसअघि प्रदेशसभा नचलेका बेला तत्कालीन एमाले नेतृत्वको सरकारले पनि कांग्रेस, माओवादी केन्द्र, लगायत दलले समर्थन फिताृ लिएपछि आर्थिक वर्ष २०८०/८१ का लागि अध्यादेशबाट बजेट ल्याएको थियो । उक्त बजेटलाई प्रतिपक्षी दल नेपाली कांग्रेस लगायत माओवादी केन्द्र, एकीकृत समाजवादीका सांसदहरुले बजेट अस्वीकार्य रहेको भन्दै प्रदेशसभामा विरोधको सूचनासमेत दर्ता गरेका थिए । 

पछि कांग्रेसको नेतृत्वमा सरकार गठन भएपछि मंगलबार मात्र विरोधको सूचना फिर्ता लिएर प्रतिस्थापन प्रस्ताव ल्याउने जनाएका थिए । यही क्रममा कंग्रेसका उद्वव थापा नेतृत्वको वर्तमान सरकारले पनि प्रदेशसभा अन्त्य गरेर अध्यादेशबाट बजेट ल्याउने भएको हो । 

अहिले कोहीमा एमाले र राप्रपा प्रतिपक्षमा छन् । एमाले त मुख्यमन्त्री थापा नेतृत्वको सरकार असंवैधानिक रहेको भन्दै बदरका लागि सर्वोच्च अदालतमा बुधबार मात्र मुद्दा हालेको छ । जसको सुनुवाइका लागि बिहीबार पेशी तोकिएको छ ।