स्रोत-साधनले सम्पन्न नेपालका युवालाई पैसा खोज्न दलालहरुले मरुभूमि पठाइरहेका छन् : विप्लव

८ भदौ, काठमाडौं । नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ले नेपालमा समृद्धि र स्वाधीनताका लापग अन्तिम विद्रोहको आवश्यक रहेको बताएका छन् । 

समाजवादी मोर्चाको वीरगन्जमा आज आयोजित सन्देश सभामा बोल्दै उनले नेपालका दलाल पुँजीवादविरुद्धको अन्तिम विद्रोह गरेर नफ्याँकेसम्म समृद्धि र स्वाधीनता कायम नहुने बताए । विद्रोहमा मधेसको साथ अनिवार्य रहेको उनको भनाइ छ । 

दलाल र खराब पुँजीपतिको दबदबाका कारण श्रमजीवि वर्ग र मजदुर, किसान सधैं अन्याय र अभावमा परेको बताउँदै त्यसलाई चिर्न विद्रोह एक मात्र विकल्प रहेको उनले बताए । समाजमा ऋण दिएर चर्को ब्याज उठाउने काम दलाल व्यवस्थाकै कारण भएको भन्दै त्यसलाई फाल्न सबै नागरिक एकजुट हुनुपर्ने बताए । विद्रोहको नेतृत्व मोर्चा र आफ्नो पार्टीले गर्ने बताए । 

उनले राजनीतिमा दलालीकरण भएकै कारण मुलुक प्राकृतिक रुपले धनी भइकन पनि युवाहरुलाई पैसा खोज्न विदेश जानुपर्ने बाध्यता रहेको बताए । ‘दलाली संस्कारकै कारण नेताहरुले हाम्रा युवाहरूलाई अहिले पनि पैसा खोज्न मरुभूमि पठाउने काम गरिरहेका छन्, युवालाई बेचेर खाने काम कदापि राम्रो होइन’ उनले भने ।

मोर्चा गठनपछि देशीविदेशी दलालहरु आत्तिएको र मोर्चालाई घेराबन्दी गर्ने योजना लागेको भन्दै जस्तोसुकै घेराबन्दी तोड्ने क्षमता मोचाँसँग रहेको बताए । नेपाली विशेषताकाे समाजवादी व्यवस्था स्थापना नभएसम्म मुलुकमा समृद्धि नआउने भन्दै युवाहरुलाई त्यसतर्फ लाग्न अपिल गरे ।