कांग्रेसको अनुशासन समितिले तीन तहबाट आएका २१ सय उजुरीमाथि आजबाट छानविन सुरु गर्ने

११ भदौ, काठमाडौं । नेपाली कांग्रेसको केन्द्रीय अनुशासन समितिले संघ, प्रदेश र स्थानीय तहको निर्वाचनमा पार्टीको निर्देशन उल्लंघन गर्ने नेता कार्यकर्ताहरू विरुद्ध परेका उजुरीमाथि छानबिन गर्ने भएको छ । आइतबार बसेको अनुशासन समितिको बैठकले आजदेखि उजुरीका फाइल खोल्ने निर्णय गरेको हाे ।

बैठकले अनुशासन समितिको कार्यविधि २०८० (संशोधनसहित) पारित गरेको छ । विगतकै कार्यविधिमा केही संशोधनसहित पारित गरिएको र सोमबारदेखि उजुरीहरू हेर्ने र त्यसपछि आवश्यकताअनुसार छानबिनको काम अघि बढाइने भएको छ । केन्द्रीय कार्यालयका सचिव प्रेम केसीलाई समितिको सचिवमा मनोनयन गरिएको छ । 

गत वर्ष सम्पन्न भएका तीन तहका निर्वाचनमा पार्टीको हृवीप उल्लंघन गर्ने केन्द्र, प्रदेश र जिल्लाका नेताहरू विरुद्ध देशैभरबाट २१ सय उजुरी परेका छन् । तीमध्ये कतिपयमा जिल्ला कार्यसमितिले निर्णय गरेर कारबाहीको लागि सिफारिस गरेका छन् भने कतिपय जिल्लाका सभापतिहरू विरुद्ध नै उजुरी छन् । केन्द्रीय सदस्य र सांसदहरूले समेत पार्टीका उम्मेदवारलाई सहयोग नगरेको भन्दै उजुरीहरू परेका छन् ।

देशैभरबाट आएका २१ सय उजुरीमाथि पहिले अध्ययन हुने र त्यसपछि आवश्यकताअनुसार छानबिन समिति बनाउनुपर्ने भए बनाउने, नभए समितिले नै स्थलगत अवलोकन गर्ने, सोधपुछ गर्ने र प्रमाणका आधारमा कारबाहीको प्रक्रिया अघि बढाउने निर्णय हुनेछ । 

समितिको संयोजकमा सभापति शेरबहादुर देउवाले आनन्दप्रसाद ढुंगानालाई निर्वाचनअघि नै संयोजक तोकेका थिए । तर समितिले पूर्णता नपाउँदा काम गर्न नसकेको भन्दै ढुंगानाले साउन पहिलो साता बसेको केन्द्रीय समिति बैठकमा गुनासो गरेपछि सभापति देउवाले गत साता अन्य चार जना सदस्य मनोनीत गरेका थिए । समितिको सदस्यमा ईश्वरी न्यौपाने, ध्रुव वाग्ले, सञ्जयकुमार गौतम र राजीव कोइराला मनोनीत भएका थिए ।