पत्थरीको उपचारमा बिरामीको ज्यान गएकाे घटना छानबिनकाे माग गर्दै आफन्तद्वारा सडक अवरुद्ध

११ भदौ, काठमाडौं । कैलालीको धनगढीस्थित स्वस्तिक कार्डियो एण्ड मल्टिस्पेसियालिटी हस्पिटलमा पत्थरीको शल्यक्रिया गर्न आएका बिरामीको मृत्यु चिकित्सकको लापरवाहीबाट भएको भन्दै आफन्तले प्रदर्शन गरेका छन् ।

दुबै मृगौलामा पत्थरी भएर शल्यक्रिया गर्न शनिबार अस्पताल आएका कञ्चनपुरको बेलौरी नगरपालिका वडा नम्बर १० शिवनगरका ५५ वर्षीय ऐजनलाल चौधरीको मृत्यु भएपछि सोमबार आफन्त सघर्षमा उत्रिएका हुन् ।
मृगौलाबाट पत्थरी निकालिएपछिको अवस्थामा बिरामीको मृत्यु भएको प्रदर्शनकारीहरुको दाबी छ ।

यही विषयमा आज स्वस्तिक अस्पताल प्रशासन र मृतकका आफन्तबीच भएको वार्ता बिना निष्कर्ष टुंगिएको छ । अस्पताल प्रशासन र उपचारमा लापरवाही गर्ने चिकित्सकविरूद्ध किटानी जाहेरी दिने भएका छन् ।

घटनाको सत्यतथ्य सार्वजनिक गर्नुपर्ने, उपचारमा संलग्न चिकित्सकलाई कारबाही गर्नुपर्ने र उचित क्षतिपूर्ति दिनुपर्ने मागसहित मृतकका आफन्तले शहीद गेटस्थित सडक अवरुद्ध पारेका छन् ।