गंगामाया अधिकारीलाई ३७ लाख ४७ रुपैयाँ उप्लब्ध गराइसकिएको छ : प्रधानमन्त्री

१२ भदौ, काठमाडौं । प्रधानमन्त्री प्रचण्डले द्वन्द्वकालमा मारिएका गोरखाका कृष्णप्रसाद अधिकारीको न्यायका लागि वर्षौंदेखि काठमाडौंमा अनसन बसिरहेकी आमा गंगामाया अधिकारीलाई राज्यबाट आवश्यक स्वास्थ्य सेवा र संरक्षणको काम जारी भइरहेको बताएका छन् ।

मंगलबार प्रतिनिधिसभाको बैठकमा सांसद एकनाथ ढकालको प्रश्नको जवाफ दिँदै प्रचण्डले गंगामायाको स्वास्थ्योपचार र संरक्षणका लागि हालसम्म ३७ लाख ४७ लाख रुपैयाँ राज्यबाट उप्लब्ध गराइसकेको जानकारी दिए । गंगामायाको स्वासथ्य अवस्था सामान्य रहेको रिपोर्ट आफूले पाएको उनले बताए । 

कृष्णप्रसादलाई सशस्त्र संघर्ष (जनयुद्ध) चलिरहेको बेला विद्रोही नेकपाले गोरखाबाट चितवन पुर्याइ हत्या गरेको आरोप लगाइँदै आएको छ । छोरा कृष्णका हत्यारालाई कारवाहीको माग गर्दै गंगामाया र उनका श्रीमान नन्दप्रसाद अधिकारीले शान्ति प्रक्रियापछि अनसन सुरु गरेका थिए । अनसनकै बेला २०७१ असोज ६ मा नन्दप्रसादको निधन भइसकेको छ । उनको शव हाल टिचिङ अस्पताल महाराजगन्जमा राखिएको छ । छोराको हत्याराले कारवाही नभएसम्म नन्दप्रसादको शव नबुझ्ने अडान जेठ छोराले राख्दै आएका छन् ।

प्रधानमन्त्री प्रचण्डले कृष्णप्रसादको घटनाबारे सत्यतथ्य पत्ता लगाउने र न्याय दिने काम संसदमा विचराधीन संक्रमणकालीन न्यायसम्बन्धी विधेयक पारित ऐन बनाएर हुने बताए । 

जनताको स्वतन्त्रता, मानवअधिकारको रक्षाका लागि प्रतिवद्ध रहेकाे उनले बताए ।