भेरी अस्पतालकाे निरीक्षणपछि स्वास्थ्यमन्त्रीले भने- ‘पुराना कर्मचारीको सरुवा प्रक्रिया बढाउनुस्’

१४ भदौ, काठमाडौं । स्वास्थ्य तथा जनसंख्यामन्त्री मोहन बस्नेतले लामो समयदेखि एउटै कार्यालयमा रहेका कर्मचारीलाई सरुवा गर्न निर्देशन दिएका छन् । 

एउटै व्यक्ति लामो समयसम्म एकै ठाउँमा बसेर सेवा दिँदा सेवा प्रभावकारी बन्न नसक्ने जनाउँदै त्यस्ता कर्मचारीलाई अन्यत्र सरुवाका लागि प्रक्रिया अघि बढाउन सरकारी अस्पताल प्रशासनलाई निर्देशन दिएका हुन् । 

उनले नेपालगन्जस्थित भेरी अस्पतालको निरक्षण गर्ने क्रममा एउटै व्यक्ति एकै कार्यालयमा १५/१६ वर्षदेखि रहेको पाइएको बताए । पुराना कर्मचारी सरुवा गरेर अस्पताललाई व्यवस्थित र सेवामा तीव्रता ल्याउन निर्देशन दिए । निरीक्षणपछि बैठक राखेर अस्पतालको सेवा र व्यवस्थापन चुस्ता र प्रभाकारी बनाउन आवश्यक बजेट छुट्याउने आश्वसन दिए । 

साथै अस्पतालमा गरिब तथा विपन्न परिवारका बिरामीहरुले सहज र सुलभ रुपमा अस्पतालमा उपचार पाउने व्यवस्था मिलाउन निर्देशन दिँदै अस्पतालकाे सेवा र व्यवस्थापनकाे नियमित प्रगति विवरण तयार पार्नु पर्नेमा जाेड दिए ।