डोल्पामा तिलिचोभन्दा २७१ मिटर अग्लो स्थानमा नयाँ ताल फेला

१८ भदौ, काठमाडौं । डोल्पामा को डोल्पोबुद्ध गाउँपालिकामा तिलिचो तालभन्दा अग्लो स्थानमा ताल फेला परेको स्थानीय जनप्रतिनिधिले बताएका छन् । डोल्पोबुद्ध गाउँपालिका–६ फालगाउँमा कुन्ख्येन फालक ताल फेला परेको हो ।

ताल रहेको उचाई समुन्द्र सतहबाट ५ हजार १ सय ९० मिटर उचाइमा रहेको दाबी स्थानीय जनप्रतिनिधिले गरेका छन् । नेपालमा हालसम्म प्रमाणित सबैभन्दा उचाइमा रहेको ताल मनाङ जिल्लाको तिलिचो ताल हो । तिलिचो विश्वकै सबैभन्दा बढी उचाईमा रहेका तालहरूमध्येमा पर्दछ ।  अन्नपूर्ण संरक्षण क्षेत्रभित्र पर्ने यो ताल समुद्रा सतहबाट ४ हजार ९१९ मिटर उचाईमा छ । तालको लम्बाई ४ किलोमिटर छ। चौडाइ १.२ किलोमिटर र गहिराई सरदर २०० मिटर छ ।

डोल्पामा भेटिएको भनिएको कुन्ख्येन फालकको लम्बाई ५ सय ११ र चौडाई ३ सय १३ मिटर रहेको वडा नम्बर ६ का अध्यक्ष नुर्बु डम्डुल गुरुङले बताए । उनले स्थानीयले दिएको खबरपछि उनले जीपीएस जाँच टोली लिएर शनिबार उक्त ताल पुगेका थिए । 

नयाँ तालको रङ आकाशे निलो र प्राकृतिक हिसाबले अत्यन्तै मनमोहक र सुन्दर रहेको गुरुङले बताए । डोल्पोबुद्ध गाउँपालिकाको केन्द्रबाट तालसम्म पुग्न मोटरसाइकल ४ र पैदल यात्रा गरेर २ घन्टा लाग्ने उनले बताए । ताल रहेको क्षेत्रबाट चीनसँगको नेपालको सीमा भेटिन् करिब डेढ हिड्नुपर्नेछ । त्यसपछि नेपाल चीनको १५ नम्बर सीमास्तम्भमा पुग्न सकिने गुरुङले बताए  । 

तालको आधिकारिकरुपमा रुपमा प्रमाणित गर्न सरकारले अग्रसर हुनुपर्ने गाउँपालिकाका उपाध्यक्ष पेम्मा धोर्चे गुरुङले बताए । सरकारका निकायले प्रमाणित गरेपछि प्रचारप्रसारमा स्थानीय तह लागिपर्ने उनको भनाएइ छ । हिमाली क्षेत्रमा मानव बस्न नसकेका कारण हिमाल छेउछाउका अवस्थाबारे राज्य बेखबरजस्तै रहँदै आएको स्थानीयको गुनासो छ ।