एकीकृत समाजवादीले १५ दिने मेची–महाकाली अभियान चलाउने

१९ भदौ, काठमाडौं । नेकपा एकीकृत समाजवादीले १५ दिने मेची–महाकाली अभियान चलाउने भएको छ । पार्टी संगठन विस्तारका लागि अभियान चलाउन लागेको हो । पार्टी पङिक्तलाई क्रियाशील बनाउने उद्देश्यसहित मेची महाकाली अभियान चलाउन भन्दै केन्द्रीय कमिटीले गरेको निर्णयलाई सोमबार बसेको सचिवालय बैठकले अनुमोदन गरेको छ । 

अभियान अन्तर्गत देशभर रूपान्तरणकारी एजेन्डा जनतामाझ लैजाने जनाएको छ । सचिवालय बैठकले आगामी असोज १४ गतेदेखि २९ गतेसम्म मेची महाकाली अभियान चलाउने निर्णयसहितको प्रस्ताव पनि पारित गरेको छ । सम्मानित नेता झलनाथ खनालका अनुसार अभियान मेचीबाट सुरु गरेर महाकालीमा समापन गर्ने तयारी छ । एकीकृत समाजवादीका नेताहरूका अनुसार अभियानमा सचिवालयका अधिकांश नेताका साथै १ सयभन्दा बढी नेता कार्यकर्ता अभियानभर सहभागी हुनेछन् । 
 
सचिवालय बैठकले माघ १४–१८ मा हुने महाधिवेशनको केही तालिका समेत तय गरेको छ । त्यसमा असोज ५ भित्र सबै कमिटीका बैठकहरू बसिसक्न निर्देशन दिने, तल्ला कमिटीका रेकर्डहरू पार्टी केन्द्रमा पठाउनुपर्ने, असोजभित्र दस्ताबेजहरू तयार गरिसक्नुपर्ने लगायतका निर्णय गरेको छ ।