एमालेको लुम्बिनी कमिटी चयनका लागि मतदान सकियाे

१९ भदौ, काठमाडौं । नेकपा (एमाले) लुम्बिनी प्रदेश कमिटीको नयाँ नेतृत्वका लागि बुटवलमा जारी अधिवेशनमा भइरहेको मतदान सकिएकाे छ । 

बिहान ८ बजे सुरू भएको मतदान अवधि दिउँसो १ बजेसम्मका लागि तोकिएको थियो। तर १ बजेभित्र हलभित्र छिरेका प्रतिनिधिले मतदान गर्न २ बजेसम्म लागेको निर्वाचन निर्वाचन मण्डल जानकारी दिएको छ। प्रदेशभरिका एक हजार ५ जना मतदातामध्ये ९ सय ६५ जनाले मतदान गरेको निर्वाचन मण्डलले जनाएको छ । 

आजै मतगणना सुरु हुने र राति अबेरसम्म नतिजा सार्वजनिक हुने निर्वाचन मण्डलले बताएको छ । प्रदेश कमिटी अध्यक्षमा हरि रिजाल र राधाकृष्ण कँडेलबीच प्रतिस्पर्धा भइरहेको छ ।

पार्टी केन्द्रीय अध्यक्ष केपी शर्मा ओलीको सहमतिबाट कमिटी चयन गर्न दिएको निर्देशनका बाबजुद मतदानमा पुगेको हो । लुम्बिनी नेतृत्वका लागि पार्टी उपाध्यक्ष विष्णु पौडेल र महासचिव शंकर पोखरेल गुटबीच प्रतिस्पर्धा भइरहेको हो ।