उद्योगमा तत्काल विद्युत आपूर्ति बन्द नगर्न विद्युत प्राधिकरणलाई प्रधानमन्त्रीको निर्देशन

२५ भदौ, काठमाडौं । प्रधानमन्त्री पुष्पकमल दाहाल प्रचण्डले नेपाल विद्युत प्राधिकरणलाई तत्काल उद्योगमा विद्युत आपूर्ति बन्द नगर्न निर्देशन दिएका छन्  । नेपाल विद्युत प्राधिकरणले डेडिकेटेड फिडर र ट्रंक लाइनको महसुल तिर्न १५ दिनको सूचना निकालेपछि नेपाल उद्योग बाणिज्य महासंघको अध्यक्ष चन्द्रप्रसाद ढकालसहितको टोलीले प्रधानमन्त्रीलाई भेटेर आग्रह गरेपछि उनले यस्तो निर्देशन दिएका हुन् । 

डेडिकेटेड फिडर र ट्रंक लाइनका सम्बन्धमा देखिएको विवाद समाधान गर्न अध्ययन भइरहेको र अध्ययन नसकिएसम्म उद्योगहरूको विद्युत आपूर्ति बन्द नगर्न नेपाल विद्युत प्राधिकरणलाई उनले निर्देशन दिएका हुन् । महासंघका अध्यक्ष ढकालको नेतृत्वमा महासंघ पदाधिकारीसहित प्रधानमन्त्री  भेट्न बालुवाटार पुगेका थिए । त्यसपछि प्रधानमन्त्री प्रचण्डले प्राधिकरणका प्रबन्ध निर्देशक कुलमान घिसिङलाई उक्त निर्देशन दिएका हुन् ।

महासंघले अहिलेको आर्थिक संकटको समयमा उद्योग व्यवसायहरू ४० प्रतिशतभन्दा कम क्षमतामा सञ्चालन भइरहेको र उद्योग व्यवसायलाई जोगाउन विशेष पहल गर्नुपर्ने माग प्रधानमन्त्री समक्ष राखेको छ । महासंघ अध्यक्ष ढकालले यस अवस्थामा उद्योग व्यवसायको विद्युत काट्दा व्यवसायी थप हतोत्साही हुने बताएका थिए । 

प्रधानमन्त्रीले यस सम्बन्धी विषयमा महासंघ, विद्युत नियमन आयोग र प्राधिकरणलाई सँगै राखेर छिटै टुङ्गोमा पुर्याउने कुरामा आफूले पहल गर्ने बताए । नेपाल विद्युत प्राधिकरणले उद्योगहरूलाई डेडिकेटेड फिडर र  ट्रंक लाइनको बक्यौता महशुल १५ दिनभित्र चुक्ता गर्न भदौ १७ गते सूचना जारी गरेको थियो । उक्त सूचनामा बक्यौता महसुल चुक्ता नगर्ने उद्योगहरूको विद्युत आपूर्ति बन्द गर्ने जनाएको थियो ।