शिक्षण अस्पतालले भन्यो- ‘अस्पताल ल्याइपुर्याउँदा नेम्वाङको जीवनसम्बन्धी कुनै चाल थिएन’

२६ भदौ, काठमाडौं । नेकपा (एमाले)का उपाध्यक्ष तथा पूर्वसभामुख सुवासचन्द्र नेम्वाङको निधनबारे त्रिवि शिक्षण अस्पतालले मंगलबार विज्ञप्ति निकालेको छ ।

अस्प्तालका कार्यकारी निर्देशक डा. सन्तकुमार दासले नेम्वाङलाई गएराति १ बजेर ५० मिनेटमा उपचारका लागि अस्पताल ल्याइपुर्याइएको जनाएका छन् । अस्पताल आइपुग्दा मुटुको चाल नभएको र आँखाको नानी फुलिसकेको अवस्था रहेको प्रष्ट्याएका छन् । 

नेम्वाङलाई अस्पताल पुर्‍याएलगत्तै चिकित्सकहरुले नाडी, मुटुको धड्कन र श्वासप्रश्वासको अवस्था जाँच गरेका थिए ।  चेकजाँच गर्दा रक्तचाप (बीपी) र पल्स (चाल) रेकर्ड गर्न हुन नसकेको जनाइएको छ । ​​​​​​चिकित्सकहरुले ३५ मिनेटसम्म सी.पी.आर. गर्दा पनि जीवनसम्बन्धी कुनै संकेत नदेखिएकाले ३ बजे मृत घोषणा गरिएको विज्ञप्तिमा उल्लेख छ ।

बालुवाटारस्थित नेम्वाङ घरभित्रकै शौचालयमा बेहोस अवस्थामा फेला परेका थिए । परिवारका सदस्यहरुले थाहा पाएर त्रिवि शिक्षण अस्पताल पुर्‍याएका थिए । चिकित्सकका अनुसार नेम्वाङको मुटुको चाल अस्पताल ल्याइपुर्याउनु पहिल्यै बन्द भइइसकेको थियो । अस्पतालले नेम्वाङप्रति श्रद्धाञ्जली व्यक्त गरेको छ ।

यो पनि पढ्नुहोस