घुस मागिएको अडियो प्रकरणमा रास्वपाले थाल्यो केन्द्रीय सदस्य थापामाथि छानबिन

२७ भदौ, काठमाडौं । मन्त्री बन्न मेडिकल व्यवसायीसँग अढाइ करोड रुपैयाँ घुस माग गरेको भनिएको अडियो प्रकरणमा नाम मुछिएका राष्ट्रिय स्वतन्त्र पार्टी (रास्वपा)का केन्द्रीय सदस्य मोहनजंग थापामाथि पार्टीले छानबिन सुरु गरेको छ । 

झापाका मेडिकल व्यवसायी दुर्गा प्रसाईंसँग दुई करोड ५० लाख रुपैयाँ मागेको अडियो सार्वजनिक भएपछि सांसद पदबाट हटाइएका ढाकाकुमार श्रेष्ठले सार्वजनिक रुपमै मोहनजंगको नाम मुछेका थिए । केही दिनअघि एक टेलिभिजन अन्तर्वार्तामा श्रेष्ठले कोर टिमको सदस्य मोहनजंगले मन्त्री बनाइदिने भन्दै आफूसँग ३ करोड रकम माग गरेको बताएका थिए । 

केन्द्रीय अनुशासन आयोगका प्रमुखसमेतको उपस्थितिमा हिजो बसेको पार्टीको केन्द्रीय कार्यसम्पादन समितिको बैठकले सदस्य थापमाथि छनबिन गर्ने निर्णय गरेको हो । निर्णयपछि अनुशासन आयोगबाट केन्द्रीय सदस्य मोहनजंग थापालाई सोधपुछ तथा अनुसन्धानको प्रक्रिया अगाडि बढाएको जानकारी पार्टीका महामन्त्री मुकुल ढकालले बुधबार विज्ञप्तिमार्फत जानकारी दिएका छन् । 

पार्टीका कुनैपनि तहको पदाधिकारी वा केन्द्रीय सदस्यले पार्टीको नाम प्रयोग गरी कसैसँग पैसा मागेको प्रमाण लिएर आउन समेत सबैसँग आग्रह गरिएको छ । प्रमाणसहित आएको खण्डमा  पार्टीले त्यस्ता सदस्य जोकोही भए पनि प्रमाण पेश भएको ७२ घन्टाभित्र कारवाही गरिने स्पष्ट पारिएको छ ।