बलात्कारका आरोपी ‘सिद्धबाबा’ले फेरि पाए सफाइ

२७ भदौ, काठमाडौं । सिद्धबाबा भनिने कृष्णदासलाई महिला अनुयायी माथि जबरजस्ती करणी (बलात्कार) कसुर मुद्दामा जिल्ला अदालत सुनसरीले सफाइ दिएको छ । 

जिल्ला अदालत सुनसरीका न्यायाधीश हरिप्रसाद कोइरालाको इजलासले अभियोग दाबी नपुग्ने भन्दै बुधबार सो मुद्दाबाट दासलाई सफाइ दिने निर्णय गरेको हो । अभियोग दाबी नपुगेकाले मुद्दामा सफाइ दिएको सुनसरी जिल्ला अदालत प्रशासनले जनाएकाे छ । 

गिरीलाई २०७७ मंसिर २२ गते जिल्ला अदालत सुनसरीका तत्कालीन न्यायाधीश अर्जुनप्रसाद कोइरालाको इजलासले सफाइ फैसला दिँदा उक्त फैसला बदरका लागि उच्च अदालत विराटनगरमा परेको पुनरावेदनमाथि सुनुवाइ हुँदा फैसला उल्टिएको थियो ।

३ जेठ २०७९ मा उच्च अदालत विराटनगरका कामु मुख्यन्यायाधीश सत्यमोहन जोशी थारु र किरणकुमारी गुप्ताको इजलासले मुद्दामा सफाइ दिने जिल्लाको फैसलामा गम्भीर त्रुटि देखाउँदै पुन प्रमाण बुझेर न्याय निरुपण गर्न आदेश दिएको थियो । आदेशपछि मुद्दा जिल्लामै फर्किएको मुद्दा जिल्लामा २०७९ असार १४ गते पुनः मुद्दा दर्ता भएको थियो ।  त्यसपछि जिल्ला अदालतमा  पुनः दर्ता भएको मुद्दा आज भएको सुनुवाइपछि पुनः सफाइको फैसला भएको हो । 

२०७६ कात्तिक ४ गते राति सिद्धबाबाले जबरजस्ती करणी गरेको पीडितले दाबीसहित २०७६ मङ्सिर ११ गते किटानी जाहेरी दिएकी थिइन् ।