तीज पर्वका कारण सर्याे सन्दीप लामिछानेविरुद्धको मुद्दाको सुनुवाइ

१ असोज, काठमाडौं । क्रिकेटर सन्दीप लामिछानेविरुद्धको बलात्कार कसुरसम्बन्धी मुद्दाका जिल्ला अदालत काठमाडौंमा आज सुनुवाइ नहुने भएको छ ।

यसअघि मुद्दाको अन्तिम टुंगो लगाउन आज सुनुवाइका लागि पेसी तोक्न आदेश भएको थियो छ । तर हिन्दू महिलाहरुको मुख्य पर्व हरितालिका तीज पर्व परेको र यस अवसरमा महिलाहरुलाई सरकारले काममा छुट्टी दिएकोले अदालतमा पर्याप्त न्यायाधीश नभएका र महिला कर्मचारीहरु समेत बिदामा रहेका कारण सुनुवाइ नहुने भएको हो ।

जिल्ला अदालत प्रशासनले मुद्दालाई आज स्थगित’ सूचीमा राखेको छ । गएकाे भदौ २१ मा न्यायाधीश शकुन्तला कार्कीको इजलासले पीडित किशोरी (गाैशाला २६) र उनको परिवार बसाइँसराई गरी गएको काठमाडौँको एक स्थानीय तहबाट बसाइसराई गर्दा पेश गरिएको कागजात, आमाको उमेरमा विवाद देखिएपछि त्यसलाई पुष्टि गर्न आमाको जन्म मिति यकिन हुने गरी कागजात पेस गर्न आदेश भएको थियो । स्थानीय तहबाट कागजात प्राप्त भएपछि आज असोज १ का लागि अन्तिम सुनुवाइ भन्दै पेशी तोकिएको थियो ।

२०७९ कात्तिक १४ गते काठमाडाैं जिल्ला अदालतमा दर्ता भएको लामिछानेविरुद्धको जबरजस्ती करणी मुद्दा हालसम्म २७ पटक पेसीमा चढिसकेको छ । लामिछानेले २०७७ भदाै ५ गते राति किशाेरीलाई काठमाडाैंकाे पिंगलास्थानस्थित हाेटल काठमाडाैं इनमा पुर्याएर कुटपिट र बलात्कार गरेकाे अभियाेगमा मुद्दा चलाइएकाे छ ।