बुधबारदेखि रत्नपार्क-सूर्यविनायक ‘द्रूत बस सेवा’, एकतर्फी यात्रा ४५ मिनेटमै

२ असोज, काठमाडौं । सरकारले भोलि असोज ३ गतेदेखि  काठमाडौंको रत्नपार्कदेखि भक्तपुरको सूर्यविनायक आउजाउ गर्ने यात्रुका लागि ‘द्रूत बस सेवा’ संचालन गर्ने भएको छ । सेवा दिन सडकमा ‘डेडिकेटेड लेन’ बनाउने कार्य जारी राखेको छ । 

सरकारको द्रूत बस सेवा सञ्चालन गर्ने योजनाअनुसार भोलि बुधबारदेखि सञ्चालन गर्न लागिएको बस सेवाको डेडिकेटेड लाइन (रातो रंगमा) तयार भइरहेको काठमाडौँ उपत्यका ट्राफिक प्रहरी कार्यालयले जनााएको छ । सेवा संचालनपछि एकतर्फी ४५ मिनेटमा पुग्न सकिने दाबी कार्यालयको छ । 

बिहान र बेलुका कार्यालय समयमा बानेश्वर, कोटेश्वर, जडिबुटीमा चर्को ट्राफिक जाम परेर यात्रुलाई २ घण्टासम्म समय खर्चिनुपर्ने बाध्यता हटाउन सरकारले याे सेवाको अवधारणा ल्याएको बताइन्छ । सेवाको उद्घाटन भोलि बिहान ८ बजे रत्नर्पाकबाट हुने जनाइएको छ । 

द्रुत सेवाका लागि २५ वटा बस सञ्चालनमा ल्याउने योजना रहेपनि भोलिबाट दुई वटा बसले सेवा सुरु गर्ने बताइएको छ । डेडिकेटेड लाइनमा अन्य सवारी साधन रोक्नु हुँदैन । रोकिएमा ट्राफिकले तत्काल खाली गर्ने उपत्यका ट्राफिक महाशाखा प्रमुख प्रहरी वरिष्ठ उपरीक्षक राजेन्द्रप्रसाद भट्टले बताए ।