सहायक रथी यमबहादुर अधिकारीको पदावधि थप नियमबमोजिम : नेपाली सेना

४ अजोज, काठमाडौं । नेपाली सेनाका सहायक रथी यमबहादुर अधिकारीको कार्यकाल थप गर्ने निर्णय नियमित प्रक्रिया बमोजिम भएको प्रष्ट पारेको छ । तत्कालीन माओवादी जनसेवाबाट नेपाली सेनामा समायोजन भएका अधिकारीको कार्यकाल ३ थप गर्ने निर्णय गत शुक्रबार बसेको मन्त्रिपरिषदको बैठकले गरेको थियो । 

मन्त्रिपरिषदले नियम मिचेर अधिकारीको कार्यकाल थप गरेको भन्दै प्रश्न उठेपछि बिहीबार सेनाको जनसम्पर्क निर्देशनालयले एक प्रेस नोट जारी गरेर स्पष्ट पारेको छ । निर्देशनालयले अधिकारीका पदावधि थप सैनिक ऐन र नियमावली अनुसार भएको जनाएको छ । 

चार वर्षअघि सहायक रथीमा बढुवा भएका अधिकारीको कार्यकाल गएको भदौ ३१ मा सकिँदैथियो । सोपछि सरकारले ३ वर्ष कार्यकाल अवधि थप नगर्ने निर्णय लिएको थियो । 

‘‘नेपाली सेनामा सहायक रथीको विशेष पदमा कार्यरत सहायक रथी यमबहादुर अधिकारीको पहिलो चार वर्षे पदावधि समाप्त हुने मिति २०८० भाद्र ३१ गतेबाटै लागू हुने र सहायक रथी दर्जाको विशेष पदलाई निरन्तरता दिने गरी तीन वर्षको पदावधि थप भएको छ’ प्रेस नोटमा उल्लेख छ ।

अधिकारी माओवादी जनसेनाबाट समायोजन भएकामध्ये धादिङिनवासी अधिकारी सबैभन्दा माथिल्लो तहका हुन् । तत्कालीन साढे १९ हजार जनसेनामध्ये अधिकारीको नेतृत्वमा करिब एक हजार ३ सयले मात्र समायोजन रोजेका थिए । बाँकी स्वेच्छिक अवकाशमा गएका थिए । 

माओवादीले २०५२ फागुन १ बाट सुरु गरेको जनयुद्धमा जनमुक्ति सेना (पीएलए) गठन गरेर १० वर्षसम्म निरंकुश राजतन्त्रविरुद्ध सशस्त्र लडाइ लडेको थियो ।