विनयले उम्मेदवारी फिर्ता लिएपछि क्यानको अध्यक्षमा चन्द निर्वाचित

०६ असोज, काठमाडौं । नेपाल क्रिकेट संघको अध्यक्षमा चतुरबहादुर चन्द निर्विरोध निर्वाचित भएका छन् । अध्यक्षमा उमेदवारी घोषणा गरेका विनय राजभण्डारीले उम्मेदवारी फिर्ता लिएपछि उनी निर्विरोध भएका हुन् । शनिबार संघको अध्यक्ष पदमा भएको  निर्वाचनमा चन्द निर्विरोध निर्वाचित भएका हुन् । 
 
यसै गरी कोषाध्यक्ष पदमा पदम खड्का निर्विरोध भएका छन् । सो पदमा उनको मात्रै उम्मेदवारी परेको छ  ।  त्यस्तै महिला सदस्यमा जयन्ती खड्का निर्विरोध निर्वाचित भएकी छन् ।  

नेपाल क्रिकेट संघको शुक्रबार काठमाडौंमा सुरु भएको साधारणसभा आज शनिबार नयाँ नेतृत्व चयन गर्दै सम्पन्न हुनेछ  । सचिव लगायत अरू पदका लागि निर्वाचन जारी छ । 

अध्यक्षमा उम्मेदवारी घोषणा गरेका विनय राजभण्डारीले उम्मेदवारी फिर्ता लिएका छन् । बर्दिया जिल्ला क्रिकेट संघका अध्यक्ष तथा लुम्बिनी प्रदेशका उपाध्यक्ष विनयले निर्वाचनको केही घण्टा अघिमात्र उम्मेदवारी फिर्ता लिएका हुन् । 
 
उनले वर्तमान अध्यक्ष तथा अध्यक्ष पदका अर्का उम्मेदवार चतुरबहादुर चन्दसँग रहेको असमझदारीमा सहमति बनेपछि आफूले नाम फिर्ता लिएको बताए । विनयले उम्मेदवारी फिर्ता लिएपछि क्यानको अध्यक्षमा चन्द निर्विरोध निर्वाचित भएका हुन् । यद्यपि, अहिले निर्वाचनका लागि मनोनयन दर्ता भइरहेको छ ।