१३ वर्षअघि भएकाे भक्तमान श्रेष्ठ अपहरण घटनाका फरार आराेपीमध्ये एक जना प्रहरी नियन्त्रणमा

८ असोज, काठमाडौं । चितवनको भरतपुरस्थित बीपी मेमोरियल क्यान्सर अस्पतालका तत्कालीन कार्यकारी निर्देशक डाक्टर भक्तमान श्रेष्ठको अपरहरणमा संलग्न रही फरार भएकामध्ये एक जनालाई १३ वर्षपछि पक्राउ गर्न प्रहरी सफल भएकाे छ ।

प्रहरीले घटनापश्चात फरार रहेका नुवाकोटको विदुर नगरपलिका–१२ का ३९ वर्षीय लुप्पा भनिने सुब्बा तामाङलाई आइतबार पक्राउ गरेकाे हाे । उनलाई पक्राउ गरेर फैसला कार्यान्वयनको लागि आइतबार नै चितवन जिल्ला अदालतमा पठाइएको जिल्ला प्रहरी कार्यालय नुवाकोटले जनाएको छ । 

‘अपहरण तथा शरीर बन्धक मुद्दा’ मा चलेको मुद्दामा चितवन जिल्ला अदालतले उनलाई २०६९ जेठ २४ मा दोषी ठहर गर्दै १३ वर्ष कैद र एक लाख जरिवानाको फैसला सुनाएको थियो ।

४८ वर्षीय डाक्टर श्रेष्ठको २०६७ जेठ ४ मा भएको अपहरण र शरीर बन्धक कसुरमा तामाङको संलग्नता पाइएको थियो । अपहरण र त्यसपश्चात ३ किलो सुन फिरौती माग्न संलग्नमध्ये केही यसअघि नै पक्राउ परेर जेलमा छन् ।

अपहरणकारी  राजेन्द्र पण्डितलाई  २०७८ असाेज ६ मा नुवाकाेटबाट पक्राउ गरी सजाय भुक्तानका लागि जेल चलान गरिएकाे थियाे । पण्डितलाई उच्च अदालत हेटाैंडाले ९ वर्ष कैद र ५० हजार जरिवानाकाे फैसला सुनाएकाे थियाे । केही अझै फरार छन् ।

राति २२ः१५ बजे डा. श्रेष्ठ चितवन अस्पतालबाट हिमचुली विकास बैंकनजिकको मोडमा रहेको क्वाटरतर्फ जाने क्रममा अपहरणमा परेका थिए । अपहरणमा भीमसेन पण्डित, रोहित पलिवाल, बद्रीप्रसाद ढुंगाना, सुनील श्रेष्ठ, नवीन क्षेत्री, लुप्पा तामाङ भनिने सुब्बा तामाङ र गौतम योञ्जनकाे संलग्नता देखिएकाे थियाे । उनीहरूले श्रेष्ठलाइ अपहरणपछि नुवाकोट, काठमाडौं र धादिङका विभिन्न स्थानमा राखेका थिए । 

त्यतिबेला माओवादीका नेता डा. बाबुराम भट्टराई नेतृत्वकाे सरकार थियाे । जुन बेला सरकारकै मान्छेहरूले अपहरण गराएकाे आराेप समेत लगाइएकाे थियाे ।