रास्वपाको केन्द्रीय समिति र संसदीय दलको बैठक भोलि बस्ने

९ असोज, काठमाडौं । राष्ट्रिय स्वतन्त्र पार्टी (रास्वपा)ले पार्टीको केन्द्रीय समिति र संसदीय दलको बैठक भोलिका लागि बोलाएको छ । महामन्त्री मुकुल ढकालका अनुसार गृह मन्त्रालयको अनुरोधमा राष्ट्रपतिबाट फौजदारी अपराधमा सजाय काटिरहेका व्यक्तिलाई दिएको माफी विषय र जनआवाज सुन्ने कार्यक्रमको समीक्षाका लागि बैठक बोलाइएको हो । 

बैठक बसेर दुई विषयमा छलफल गरेर पार्टीको आधिकारिक धारणा सार्वजनिक गरिने भएको छ । साथै असोज ३ गतेदेखि जनआजाव सुन्न र दस्तावेजमा समेट्न केन्द्रीय सदस्य र सांसदलाई १९ जिल्लामा खटाइएकामा त्यसबारे पनि बैठकमा समीक्षा गरिने भएको छ ।

आममाफी पाएकाहरुमा अधिकांश पार्टीका कार्यकर्ता रहेको र उनीहरुको माफी कानूनसम्मत नभएको दाबी रास्वपाको छ । यद्यपि कानून, न्याय तथा संसदीय मन्त्री धनराज गुरुङले पार्टीको सोमबारको केन्द्रीय समितिको बैठकमा माफी दिने विषय आफूलाई थाहा नभएको बताएका थिए । सोपछि असन्तुष्ट दलहरुले प्रश्न उठाउन थालेका छन् ।