सडकको मुख्य लेन ढाकेर प्रदर्शन गरेपछि राहत शिक्षकको आन्दोलनमा प्रहरीले गर्यो हस्तक्षेप [ फाेटाेफिचर ]

१० असोज, काठमाडौं । राहत शिक्षकको आन्दोलनमा प्रहरीले हस्तक्षेप गरेको छ ।  सडकको मेन लेनमा पसेपछि बुधबार प्रदर्शनका क्रममा शिक्षक र प्रहरीबीच केही बेर धकेलाधकेल भएको थियो । त्यसपछि प्रहरीले हस्तक्षेप गरेको हो । निषेधित क्षेत्रमा प्रवेश गर्न नदिन लगाएको बार तोडेर अगाडि बढ्न खोजेपछि प्रहरीले केही शिक्षकलाई लछार पछार र लाठी प्रहार गरेको छ । 

उनीहरूले हरेक दिन माइतीघरदेखि नयाँ बानेश्वरसम्म प्रदर्शन गर्दै आएका थिए । बुधबार शिक्षकहरूले माइतीघर नयाँ बानेश्वर सडकको मुख्य लेनबाटै प्रदर्शन गरेका कारण सो सडक भएर चल्ने गाडीहरू बन्द भएका थिए । जसले गर्दा नयाँ बानेश्वर र माइतीघर, थापाथली क्षेत्रमा जाम बढेको छ ।

राहत शिक्षकले बबरमहल–नयाँबानेश्वर सडकमा मुख्य सडक अवरुद्ध गरेर आन्दोलन गरेका छन् । बीचको मूल सडक र बायाँतर्फको बाटो आन्दोलनकारीले कब्जा गरेपछि सवारी आवागमन अस्तव्यस्त बनेको छ । राहत शिक्षकले मंगलबार पनि काठमाडौंमा प्रदर्शन गरेका थिए । उनीहरूले काठमाडौंको माइतीघरदेखि नयाँबानेश्वरसम्म सिटी फुकेर र्याली निकालेका थिए ।

यही असोज ५ गते सरकार र शिक्षक महासंघका पदाधिकारीबीच शिक्षा विधेयकका विषयमा ६ बुँदे सहमति भएको थियो । राहत शिक्षकले त्यसप्रति असन्तुष्टि जनाउँदै प्रदर्शन जारी राखेका छन् ।