नागरिकलाई दुःख नदिने भन्दै राष्ट्रपति पौडेल इन्द्रजात्रामा सहभागी हुन हिँडेरै पुगे वसन्तपुर [ फाेटाेफिचर ]

११ असोज, काठमाडौं । राष्ट्रपति रामचन्द्र पौडेल इन्द्रजात्रामा सहभागी हुन हिँडेरै जात्रास्थल वसन्तपुरमा पुगेका छन् । जुद्ध शमशेरको शालिकदेखि उनी हिँड्दै वसन्तपुर पुगेका हुन् । जुद्ध शमशेरको शालिकबाट हनुमानढोका तिर सवारी साधन लैजान काठमाडौं महानगरले रोक पनि लगाएको छ । तर, धैरै भिडभाड हुने स्थानमा सवारीसाधन लैजाँदा नागरिकलाई सास्ती हुने भएकाले राष्ट्रपति पौडेल हिँडेर गएका राष्ट्रपतिको सचिवालयले जनाएको छ ।

इन्द्रजात्रामा राष्ट्रप्रमुख हिँडेर सहभागी भएको यो पहिलोपटक हो । इन्द्रजात्रामा पहिलोपटक राष्ट्रप्रमुख हिँडेर पुगेको यो पहिलो घटना हो । सम्माननीय राष्ट्रपति जुद्ध शालिकमा गाडीबाट ओर्लिनुभयो र सर्वसाधारणलाई अभिवादन गर्दै पैदल काष्ठमण्डप पुग्नुभयो,’ राष्ट्रिपतिका प्रेस सल्लाहकार किरण पोखरेलले नेपालबहससँग भने, ‘उहाँले सर्वसाधारणलाई दुःख हुने काम गर्नु हुँदैन भनेर पैदल आउनुभएको हो ।’

राष्ट्रपति पौडेलले यसअघि नै सर्वसाधारणको बाक्लो उपस्थिति रहने जात्रामा आफू  सर्वसाधारणलाई दुःख नहुने गरी सहभागी हुने बताएको थियो ।सुरक्षा संयन्त्रले पैदल जाँदा सुरक्षा ‘प्रोटोकल मेन्टेन’ नहुने भन्दै राष्ट्रपतिलाई गाडीमै जात्रास्थलसम्म पुग्न अनुरोध गरेका थियो । तर, राष्ट्रपतिले भने त्यसो गर्दा सर्वसाधारणलाई सास्ती हुने भन्दै हिँडेर जाने अडान राखेका थिए ।