इन्द्रजात्रामा महाकाली नाच [ फोटो फिचर ]

१३ असोज, काठमााडौं । मंगलबारदेखि सुरु भएको इन्द्रजात्रामा जिवित देवी कुमारी जिवित देव गणेश र भैरवको रथयात्रा गरियो। विभिन्न देवदेवीको ख्वापा 'मुकुन्डो' लगाएर देवगणहरु काठमाडौंको भित्री शहरमा नृत्य गरिरहेका छन्। वसन्तपुर क्षेत्रमा रथयात्राबीच महाकाली नाच देखाउन सुरु गरिएको छ 

तत्कालीन प्रधानमन्त्री जंगबहादुर राणाले काठमाडौंको राजकीय पर्व मानिने योयाः पुन्ही अर्थात् ‘इन्द्रजात्रा’मा यो नाच देखाउन थालेको भनाइ छ । भक्तपुरको ‘महाकाली प्याखँ’लगायतका समूहले बसन्तपुरमा महाकाली नाच देखाउँछन् ।

महाकाली नाचमा महाकाली, महालक्ष्मी, कुमारी, सिंह, बेता, भूत भैरव, कवं, ख्याक, माकः 'बाँदर', म्ह्यखा र मयुर गरी १७ देवगणको स्वरुपमा नाच सञ्चालन गरिन्छ । महाकाली नाच प्रदर्शनका कारण यस क्षेत्रमा भूत, प्रेत, पिशाच, जल, अग्नि, वायु, भूकम्प, चट्याङ् भय, चोरको भय नहुने जनविश्वास रहेको छ ।

नाचका नर्तकहरुले लगाउने पोशाक, मुकुण्डो र नृत्य गर्ने शैलीले गर्दा यो नाच तन्त्रमा आधारित रहेको स्थानीय संस्कृतिविदको भनाई छ । महाकाली नाचमा विभिन्न २१ वटा ताल रहेको र विभिन्न फरक–फरक समूह फरक–फरक तालमा नचाइने परम्परा रहेको छ । मुख्य भूमिकामा रहेका देवीहरुको एकल नाच पनि प्रदर्शन गरिन्छ । नाचमा ८ वर्षका बालकदेखि ३५ वर्षका युवासमेतको सहभागिता रहने गरेको छ ।