कर्मचारीलाई बोनस बाँडेर निगमले मूल्य बढाउन सुहाउँदैनः लामिछाने

१४ असोज, काठमाडौं । राष्ट्रिय स्वतन्त्र पार्टी  (रास्वपा) का सभापति रवि लामिछानेले आयल निगम घाटामा छ भने बोनस बाँढ्ने रकम कहाँबाट आयो भन्दै प्रश्न गरेका छन् । आइतबारको प्रतिनिधिसभाको बैठकमा बोल्दै उनले स्वचलित मूल्य भए आयल निगमले मूल्य घट्दा दुई दिनसम्म किन घटाउँदैन भन्दै प्रश्न गरे ।
 
“प्रधानमन्त्री भ्रमण गरेर ‘मुड फ्रेस’ गराएर आउनुभयो । आउँदा आउँदै जनताको मुड अफ गराउनुभयो । फेरि मूल्य वृद्धि फिर्ता लिने कुराले मुड फ्रेस बनाउनुभएकोमा धन्यवाद छ,” उनले भने, “आयल नियम व्यापार गर्छ, बोनस बाढ्छ, अनि घाटामा छु भन्छ । स्वचालित मूल्यबाट चल्ने भए मूल्य घटेको बेला किन यसले दुई दिनसम्म मूल्य घटाउँदैन किन ?” राष्ट्रिय स्वतन्त्र पार्टी (रास्वपा)का सांसदले प्रतिनिधिसभा बैठक केही बेर अवरुद्ध गरेका छन् । आइतबारको बैठकको सुरुमा सो पार्टीका सांसदहरूले आसनबाट उठेर विरोध गरेका हुन् । 

बैठक सञ्चालनका निम्ति सभामुख देवराज घिमिरेले सो पार्टीका सांसदहरूलाई आग्रह गरेका थिए । प्रधानमन्त्री पुष्पकमल दाहाल ‘प्रचण्ड’को सम्बोधन भएकाले बैठक अवरुद्ध नगर्न उनले आग्रह गरे ।

तर, रास्वपाका सांसदहरू नमानेपछि उनले सो पार्टीका सभापति रवि लामिछानेलाई बोल्न समय दिए । लामिछानेले चीन भ्रमणबाट ‘मुड फ्रेस’ गरेर आएका प्रधानमन्त्री प्रचण्डले नेपाली जनताको ‘मुड अफ’ हुने गरी पेट्रोलियम पदार्थको मूल्यवृद्धि गरेको भन्दै आपत्ति जनाए ।

बैठकमा सभापति लामिछानेले संविधान दिवसका दिन राष्ट्रपतिले ज्यान मुद्दामा सजाय पाएका व्यक्तिको कैद मिनाहा गरेकामा आपत्ति जनाएका थिए । उनले संविधान जारी भएको खुशियाली मनाउनुपर्ने दिनमा दिनदहाडै मान्छे काट्नेलाई उन्मुक्ति दिएको भन्दै आपत्ति जनाए ।