कर्फ्युले गर्दा १५ सय नेपाली जमुनाहा नाकामा अलपत्र

१७ असोज, नेपालगन्ज । नेपालगन्जमा मंगलबारदेखि लगाइएको  कर्फ्युका कारण भारतबाट जमुनाहा नाका भएर आउने धेरै यात्रुहरू नाकामै अलपत्र परेका छन् । नेपालगन्जमा मंगलबार दिउँसो १ बजेदेखि लागेको कर्फ्युका कारण भारतको विभिन्न ठाउँबाट आएका करिब १५ सय नेपालीहरू जमुनाहा नाकामै रोकिएका हुन् ।

प्रहरीका अनुसार स्थानीय प्रशासनले दक्षिणमा जमुनाहा, उत्तरमा राँझाचोक, पश्चिममा इन्द्रपुर गेट र पूर्वमा राप्ती नदीसम्म कर्फ्यु लगाएको छ । नेपालगन्ज बुधबार बिहानदेखिको अवस्था भने सामान्य देखिएको छ । अवस्था समान्य भएपनि नाकामा भने धेरै यात्रु अलपत्र छन् । केहीलाई प्रहरीले स्कटिङ गर्दै लएको छ । बजारमा सडकमा ठूलो संख्यामा प्रहरी परिचालन गरिएको छ । अत्यावश्यक कामबाहेक सडकमा हिँड्न दिइएको छैन ।

बाँके प्रहरी प्रवक्ता डिएसपी नारायण डाँगीले जमुनाहा नाकामा आएका उनीहरूलाई गाडी मगाएर पठाउने काम भइरहेको बताए । प्रहरीले बसपार्कबाट पाँच वटा र आफनो एउटा गाडी गरी ६ वटामा राखेर उनीहरूलाई राँझाचोकसम्म पुर्याइँदै छ । अहिले प्रहरीको गाडी कुरेर यात्रुहरू बसिरहेका छन् ।