विदेश जाने क्रम नरोकिने हो भने अबको २० वर्षमा नेपाल खाली हुन्छः केसी

१८ असोज, काठमाडौं । राष्ट्रिय जनमोर्चाका अध्यक्ष चित्रबहादुर केसीले नेपालबाट शिक्षा र कामका लागि विदेश जानेहरु अत्याधिक बढेको भन्दै यही स्थिति रहे २० वर्षमा मुलुक रित्तिने बताएका छन् । बिहीबार प्रतिनिधिसभाको विशेष समयमा बोल्दै सांसद केसीले नेपालमा राम्रो शिक्षा र काम नपाएर नभई धेरैलाई विदेश जानुपर्ने रोग लागेको टिप्पणी गरे ।

उनले भने, ‘नेपालमा यस्तो रोग लाग्यो कि मन्त्रीका छोरा, सांसदका छोरा, साहु महाजनका छोरा, धनीमानीका छोरा सबैको एउटै उद्देश्य के छ भन्दा नेपालमा केही हुन्न । त्यसकारण जाने गन्तव्य अमेरिका, युरोप, अष्ट्रेलिया, त्यो गर्न नसक्ने कमसे कम जापान । सुनियोजित किसिमले मुलुक रित्याउने जुन स्थिति भएको छ । यो एजेण्डामा हामीले संसदमा छलफल गर्नुपर्छ ।’

नेपालका राम्रा डाक्टर, नर्स, शिक्षक सबै विदेश गएको भन्दै केसीले नेपालमा शिक्षादीक्षा लिएकाहरुबाट विदेशीले फाइदा लिइरहेको बताए । ‘हामीले गोहीका आशु बगाएर मात्र हुँदैन, संसदमा विस्तृत छलफल गर्नुपर्छ र यसको निराकरण गर्नुपर्छ । हामीले गोहीका आशु बगाइरहने, मुलुक रित्तो हुने र अरुले आएर शासन गर्ने स्थिति नआओस्’, केसीले भने ।