२८० जना नेपाली इजरायलबाट फर्किन इच्छुक रहेको परराष्ट्रको दावी, आज जाने जहाजमा मृतकका शव नल्याइने

२४ असोज, काठमाडौं । सरकारले इजरायलमा अलपत्र रहेका नेपाली लिन जाने नेपाल वायुसेवा निगमको जहाजमा एकै पटक त्यहाँ मृत्यु भएकाको शव नल्याउने भएको छ । शव ल्याउन इजरायल सरकारको अनुमति चाहिने र त्यसका लागि थप प्रक्रिया पुर्याउनुपर्ने भएकाले विद्याथीहरुसँग मृतकको शव नआउने परराष्ट्र मन्त्रालयले जनाएको छ ।  

बुधबार इजरायल घटनाबारे जानकार दिन मन्त्रालयमा आयोजना गरिएको पत्रकार सम्मेलनमा परराष्ट्रकी प्रवक्ता सेवा लम्सालले शव ल्याउन इजरायल सरकारको अनुमति चाहिने जानकारी दिइन् । उनले इजरायलमा रहेका नेपालीमध्ये २८० जना स्वेश फर्किन इच्छुक रहेको जानकार दिइन् । उनले २८० जना नेपाली इजरायलबाट फर्किन इच्छुक रहेको बताइन् । 

२५० जना बोक्ने नेपाल बायु सेवा निगमको जहाज आज राती इजरायल जाँदैछ । नेपाल वायुसेवा निगमको जहाज राती २ बजे त्यसतर्फ जाने बताइएको छ । प्रवक्ता सेवा लम्सालले घाइतेको उपचार जारी रहेको, घर फर्किन चाहनेको लागि उद्धारको कार्यमा गम्भीर रूपमा लागेको बताइन् ।  हाल दुई जना विद्यार्थी डिस्चार्ज भइसकेको बताइन् । २ जना अझै उपचारको क्रममा रहेको र सम्पर्कबिहिन रहेका १ जनाको खोजीका लागि निरन्तर लागिरहेको उनले बताइन् । 

सम्पर्कविहिन बनेका बिपिन जोशीको खोजीका लागि सरकारले इजरायल सरकारसँग गम्भीर भएर लागेको बताइन् । गाजा क्षेत्र नजिक रहेका ५५ जना विद्यार्थीलाई सुरक्षित स्थानमा सारिएको उनको भनाई छ । त्यस्तै ७२ जनालाई थप सुरक्षित स्थानमा सारिएको उनको भनाई छ ।

मृतकको शव नेपाल ल्याउन समेत सरकारले प्रयास गरिरहेको बताइन् । ‘सबै मृतकको शव इजरायल सरकारको संरक्षणमा राखिएको छ । त्यहाँबाट सबै प्रकृया पुरा गरेर हामीलाई हस्तान्तरण गरेपछि हामी ल्याउँछौं ।’ उनले भनिन् । 

शव नेपाल ल्याएर मृतकका आफन्तहरूलाई बुझाउने उनको भनाई छ । यसका लागि नेपालस्थित इजरायली दूतावास र इजरायलस्थित नेपाली दूतावास सक्रिय भएर लागेको उनको भनाई छ । आज राती २५० सिट क्षमताको वाइड बडी जहाज त्यसतर्फ जान लागेको उनको भनाई छ । त्यस्तै इजरायलको व्यवसायीक उडानमार्फत फर्किन चाहनेलाई सहजिकरण गर्न सरकार तयार रहेको उनको भनाई छ ।