आर्थिक क्षेत्रमा काम गर्ने उच्चस्तरीय संयन्त्र बन्छः प्रधानमन्त्री

२५ असोज,काठमाडौं । प्रधानमन्त्री पुष्पकमल दाहाल 'प्रचण्ड'ले अर्थतन्त्रको समस्या समाधान गर्न उच्चस्तरीय संयन्त्र बनाउन सरकार तयार रहेको बताएका छन् । नेपाल उद्योग वाणिज्य महासंघले बिहीबार काठमाडौंमा आयोजना गरेको राष्ट्रिय आर्थिक बहस कार्यक्रममा बोल्दै उनले अर्थमन्त्री नेपाल फकिएपछि संयन्त्र बन्ने बताए । 

प्रचण्डले अर्थतन्त्रको समस्या समाधान गर्न उच्चस्तरीय संयन्त्र बनाउन आफू सहमत रहेको र यसका लागि सरकारमा रहेका पक्षसँग गरी अर्थतन्त्रको समस्या समाधान गर्न निजी क्षेत्र, सरकार, विज्ञ, अर्थमन्त्रालय, राष्ट्र बैंक, प्रधानमन्त्री कार्यालयबाट सहभागी हुने गरी यस्तो संयन्त्र बनाइने बताए । 

प्रधानमन्त्री प्रचण्डले अर्थतन्त्रको सुधारका लागि मेजर अप्रेशन गर्नुपर्ने आवश्यकता रहेको पनि बताए । सरकारले आगामी वर्षको नीति निर्माणमा छलफल सुरु गरेको भन्दै निजी क्षेत्रले सुरु गरेको बहसले थप मद्दत मिल्ने बताए । प्रचण्डले आर्थिक क्षेत्रमा रिफर्म ल्याउन उच्चस्तरीय वैधानिक आयोग बनाउन आफू सकारात्मक भएको बताए । 

निजी क्षेत्रका तर्फबाट नेपाल उद्योग वाणिज्य महासंघका अध्यक्ष चन्द्र ढकालले यस्तो प्रस्ताव गरेका थिए । अहिलेको कानुन तथा ऐन नियमले अर्थतन्त्रमा सुधार गर्न नसकिने भन्दै प्रधानमन्त्री प्रचण्डले सुधारका लागि आफू तयार रहेको बताए । 

उनले भने, ‘एउटा उच्चस्तरीय आयोग तथा उच्चस्तरीय कुनै समिति संयन्त्र, जसको वैधानिक आधिकारिकता होस् । त्यसले गरेको निर्णय कार्यान्वयनतिर जान सकोस् भनेर जुन प्रस्ताव गर्नु भएको छ । निजी क्षेत्रले त्यसलाई समर्थत गर्नुभयो । म त्यसलाई समर्थन गर्छु । यहीँबाट सुरू हुन सक्छ । अर्थतन्त्रमा भएको दबाब समस्याको समाधानको प्रक्रिया त्यहीँ विन्दुबाट हुन सक्छ । निजी क्षेत्रको पनि सक्रिय सहभागिता त्यस्तै संयन्त्रमा हुन सक्छ । त्यसबाट हामीले सिंगो राष्ट्रलाई विश्वासमा लिएर आर्थिक गतिविधिलाई नयाँ गति दिन सक्छौँ ।’

अर्थमन्त्री डा. प्रकाशशरण महत आएपछि यो संयन्त्र बनाउने पनि उनले बताए । विश्वासको वातावरण बनाउन पनि यो आवश्यक परेको उनले बताए । प्रचण्डले अर्थतन्त्रमा देखिएको समस्यालाई समाधान गर्न अबका नीति तथा कार्यक्रम बनाउँदा ‘बोल्ड डिसिजन’ गर्ने बताए । 

हामी टालटुले सामान्य कुराले अहिलेको समाधान दिगो रूपमा गर्न सम्भव छैन, उनले भने, ‘हामीले यो विषयमा सोच्नुपर्ने छ । त्यसो गर्न सकेनौँ भने हामीलाई अप्ठ्यारो छ । हामीले आठ÷नौ महिना सुधार गर्न बल त गरियो । वित्तीय र मौद्रिक नीति मिलाउन निकै तालमेल पनि भयो ।’

बैंकको ब्याज घटाउने केही कोसिस पनि भएको उनले बताए । त्यो एउटा सामान्य सुधार मात्र भएको उनको भनाइ छ । अन्य क्षेत्रमा केही सुधार भएको भए पनि अर्थतन्त्रको मुल समस्या समाधान हुन नसकेको प्रधानमन्त्री प्रचण्डले बताए ।