राष्ट्रसंघका महासचिवको नेपाल भ्रमणले संघीय संसदको चालु अधिवेशन लम्बिने संकेत

२६ असोज, काठमाडौं । सरकारले संघीय संसदको चालु अधिवेशन तत्कालका लागि जारी राख्ने भएको छ । संसद अधिवेशन आज अन्त्य गर्ने सरकारको तयारी थियो । तर, संयुक्त राष्ट्रसंघका महासचिव एन्टोनियो गुटेरेस कार्तिक १२ गते नेपाल आइपुग्ने भएपछि अधिवेशन लब्याउन लागिएको हो । 

इजरायलमाथि हमासको आक्रमणका कारण स्थगित भएको उनको भ्रमणको नयाँ समय तय भएको छ । गुटेरेस आउँदो कात्तिक १२ गते नेपाल आइपुग्ने प्रधानमन्त्री पुष्पकमल दाहाल प्रचण्डका निजी सचिवालयले जानकारी दिएको छ । 

यसअघि उनी आज नेपाल आउने र संघीय संसदमा संबोधन गर्ने कार्यसूची थियो । तर, इजरायलमा बढेको तनावका कारण राष्ट्रसंघका महासचिव गुटेरेसले आफ्नो भ्रमण स्थगित गरेका थिए । राष्ट्रसंघका महासचिव आउने भएपछि सरकारले आजैदेखि अन्त्य गर्ने भनेको संघीय संसदको चालू अधिवेशन तत्काल अन्त्य नहुने प्रधानमन्त्रीको निजी सचिवालयले जनाएको छ ।  

राष्ट्रसंघको ७८औं महासभामा भाग लिन अमेरिका गएका बेला प्रधानमन्त्री प्रचण्डले गुटेरेसलाई नेपाल भ्रमणको निम्तो दिएका थिए । निम्तो अनुसार आउन लागेका गुटरेस इजरायल घटनाका कारण रोकिएका हुन ।