प्रतिनिधिसभा बैठक जारी, समसामयिक विषयबारे सांसदहरूद्वारा सरकारकाे ध्यानाकर्षण

२६ असोज, काठमाडौं । शुक्रबारबार प्रतिनिधिसभाको बैठक सुरु भएको छ । दिउँसो सवा २ बजे सुरु भएको बैठक जारी छ । बैठकमा सांसदहरुले शून्य समय लिएर समसामयिक विषयमा सरकारको ध्यानाकर्षण गराइरहेका छन् । 

सांसद रामहरि खतिवडाले दशैंमा काठमाडौं उपत्यकाबाट बाहिर जाने यात्रुहरुको यात्रा सुरक्षित बनाउन सरकारसँग आग्रह गरे । उनले नेपाल वायु सेवा निगमको घाटा कम गराउन सरकारको ध्यानाकर्षण गराए । 

सांसद रघुजी पन्तले बजारमा कालो बजारिया हाबी भएको भन्दै नियन्त्रण गर्न सरकारको ध्यानाकर्षण गराए । उनले नेपाली भूमि कालापानीमा भारतीय प्रधानमन्त्री नरेन्द्र मोदीले सुटुक्क गरेको प्रवेशप्रति आपत्ति जनाए ।

सांसद माधव सापकाेटाले बैंकहरूले मनाेमानी ब्याज बढाउँदा पनि नेपाल राष्ट्र बैंक माैन बसेकाे भन्दै आपत्ति जनाए । उनले बैंकहरूले आफूखुशी बढाएकाे ब्याज राेक्न माग गरे ।

अहिले दलीय आधारमा विशेष समय लिएर सांसदहरूले बाेल्न क्रम जारी छ । विशेष समयमा धारणा राख्दै सांसद संजय गाैतमले गाजामा रहेका नेपालीहरूकाे उद्धारमा सरकारले तीव्र रूपमा काम गर्नुपर्ने बताए । मृतककाे शव ल्याउने काम छिटाे गर्न माग गरे ।