धर्म र जातिको बखेडा झिकेर बाह्य हस्तक्षेप निम्त्याउने षड्यन्त्र भइरहेको छ : नेता श्रेष्ठ

२६ असोज, काठमाडौं । नेपाल कम्युनिष्ट पार्टीका पोलिट ब्यूरो सदस्य (पीबीएम) तथा लुम्बिनी ब्यूरो इन्चार्ज बसन्त श्रेष्ठले मुलुकमा धर्म र जातिको विषय उठाएर मुलुकमा अराजकता फैलाउन खोजेको बताएका छन् । रुपेन्देहीको भैरहवामा आयोजित विचार गोष्ठीमा धारणा राख्दै नेता श्रेष्ठले नेकपालाई फुटाउन जाति र धर्म कुरा उठाउने क्रम तीव्र बनेको बताए । 

उनले भने, ‘देशमा अहिले पहाड, मधेश, तराई,धर्म जात अनेक अनावश्यक अतिरञ्जनापूर्ण र भ्रामक विषय उचालेर हामीलाई आपसमा लडाउन खोजिएको छ । राष्ट्रियतालाई कमजोर पार्न समाजको एकतालाई कमजोर पार्ने षड्यन्त्र भइरहेको छ ।’ उनले नेकपालाई द्वन्द्वमा धकेल्ने अनेक षडयन्त्र भइरहेको बताए । ‘द्वन्द्वमा धकेल्न सके देशभित्र विदेशी सेना भित्र्याउन पाइन्छ भन्ने अराष्ट्रिय तत्व सक्रिय रहेको छ’ उनले भने, ‘हामी आपसी सद्भाव कायम गर्न र आफ्नो समस्या आफैं समाधान गर्न सक्षम छौं ।’ उनले सदभावका लागि अपिल समेत गरे । 

उनले लुम्बिनीको जितगढी अंग्रेजलाई धुलो चटाएको किल्ला भएको बताए । नेपाली जनताले कुनैपनि प्रकारका विदेशी हस्तक्षेप स्वीकार नगर्ने र विकासका नाममा विदेशी बाजले अहिले शान्ति फैलाउने सेतो परेवाको शिकार गर्न खोजिएको बताए । विदेशी हस्तक्षेप र अतिक्रमणलाई असफल तुल्याउन सम्पूर्ण नेपाली एकजुट हुनुपर्नेमा उनले जोड दिए ।

यसैबीच, नेकपाले असोज २५ मा देशव्यापी रुपमा ‘सी स्मृति’ दिवस मनाएको छ । कपिलवस्तुको शिवगढीमा गत वर्ष सम्पन्न भएको पार्टीको नवौं महाधिवेशनबाट पुरानो परम्परागत जातिको विकल्पमा नयाँ जाति सी जाति अथवा कम्युनिस्ट साम्यवादी जाति बनाएको थियो । स्मृति दिवसमा जनयुद्ध, एकीकृत जनक्रान्तिका सहिद तथा आफ्न्तजनहरुको सम्झनामा दीव प्रज्वलनसहित विभिन्न कार्यक्रम गरी मनाइएको हो ।