दशैंको मुखमा भावुक देखियाे त्रिभुवन अन्तर्राष्ट्रिय विमान स्थल

२ कात्तिक, काठमाडौं । नेपालीहरुको महान पर्व विजयादशमी नजिकिँदै गर्दा आफ्नो जन्मभूमि छाडेर यति बेला  नेपाली युवा विदेश जान बाध्य भएका छन् । घर आँगनमै आइसकेको पर्व दशैंमा आफ्नो घर परिवार, आफन्त छाडेर उनीहरू विदेशीएका हुन् । 

 नेपालीका दुई ठूला पर्व दशैं र तिहार आएपनि रोजगारी तथा उच्च शिक्षाका लागि उनीहरू बिदेसिन बाध्य भएका हुन् । चाडपर्वको समयमा घर परिवार छाडेर जाँदा त्रिभुवन अन्तर्राष्ट्रिय विमान स्थलमा भावुक माहोल देखिन्छ । दशैंको मुखमा बिदेसिन बाध्य भएकाहरूले गर्दा बिहीबार त्रिभुवन अन्तर्राष्ट्रिय विमान स्थलमा भावुक देखिएको थियो । 

परिवारका सबै सदस्यसँगै बसेर चाडपर्व मनाउने नेपालीको प्रचलन हो । तर, स्वदेशमा रोजगारीका अवसर नपाएपछि सबै छोडेर युवाहरु कामका लागि विदेशिन बाध्य भएका छन् । विदेशबाट आएको भिषाले नेपालका चाडपर्व चिन्दैन । ढिला गरे भिषाको समय सकिने डरका कारण युवाहरु चाडपर्वलाई लत्याएर विदेश गइरहेका छन् ।