यस्तो छ राष्ट्रसंघका महासचिव गुटेरेसको भ्रमण तालिका ?

११ कात्तिक, काठमाडौं । आइतबार राती ११ बजे नेपाल आइ पुग्ने संयुक्त राष्ट्रसंघका महासचिव एन्टोनियो गुटेरेसले सोमबारदेखि औपचारिक भेटवार्ता सुरु गर्ने भएका छन् । उनी चारदिने नेपाल भ्रमणमा आएका हुन् । नेपाल सरकार र नेपालस्थित संयुक्त राष्ट्रसंघीय स्थायी नियोगले उनका लागि नेपाल भ्रमणका एजेन्डा र कार्यतालिका तय गरेका छन् । 

महासचिव गुटेरेसलाई प्रधानमन्त्री पुष्पकमल दाहालले सेप्टेम्बर १७ मा संयुक्त राष्ट्रसंघको ७८ औं महासभामा भेटेरै नेपाल भ्रमणको निम्तो दिएका थिए । विश्व शान्ति र नेपालको शान्ति प्रक्रिया, जलवायु परिवर्तन र विश्व शान्तिको प्रतीक गौतम बुद्धको जन्मस्थल लुम्बिनीको अन्तर्राष्ट्रियकरण, दिगो विकासका लक्ष्यलगायत नेपाल भ्रमणका मुख्य एजेन्डा रहेको परराष्ट्रमन्त्री एनपी साउदले जानकारी दिएका छन् । 

गुटेरेसले सोमाबार दिउँसो परराष्ट्रमन्त्री साउदसँग द्विपक्षीय भेटवार्ता गरेपछि प्रधानमन्त्री दाहाल र राष्ट्रपति रामचन्द्र पौडेलसँग छुट्टाछुट्टै भेटवार्ता गर्ने कार्यक्रम छ । लगत्तै नेपालका पूर्वप्रधानमन्त्रीहरूसँग सामूहिक भेटवार्ता गर्ने कार्यक्रम छ । महासचिव गुटेरेस ललितपुरको पाटन दरबार स्क्वायरको अवलोकनमा पनि जानेछन् भने त्यहाँबाट फर्केपछि प्रधानमन्त्रीको आयोजनामा हुने रात्रिभोजमा सरिक हुने परराष्ट्रमन्त्री साउदले जानकारी दिए । 

सोमबार नै महासचिव गुटेरेस जलवायु परिवर्तनको असरलाई बुझ्न सोलुखुम्बुको स्याङ्बोचेसम्म अवलोकन गर्न पुग्ने कार्यक्रम राखिएको छ । त्यसपछि उनी काठमाडौं फर्केर ललितपुरस्थित यूएन हाउसको कार्यक्रममा सहभागी हुनेछन् । त्यसपछि उनी पोखरा उड्ने र राति पोखरामै बस्ने कार्यक्रम छ । कात्तिक १४ गते मंगलबार महासचिव गुटेरेस पोखराबाट बिहान अन्नपूर्ण सर्किट अवलोकनपछि पोखरा फर्केर पुरानो विमानस्थलमा पत्रकार सम्मेलन गर्ने मन्त्री साउदले जानकारी दिए । 

यसपछि गौतम बुद्धको जन्मस्थल लुम्बिनीतर्फ जाने र लुम्बिनीबाट काठमाडौं फर्केर सोही दिन बेलुकी संघीय संसदको दुवै सदनलाई सम्बोधन गर्ने कार्यक्रम तय छ । त्यसपछि संसदकै परिसरमा पत्रकार सम्मेलन आयोजना गरिनेछ । कात्तिक १५ गते बुधबार महासचिव गुटेरेस नेपालको आफ्नो चार दिने भ्रमण पूरा गरी फर्कने कार्यक्रम रहेको परराष्ट्रमन्त्री एनपी साउदले जानकारी दिए । 

महासचिव गुटेरेसको भ्रमणमा नेपालका सुरक्षाकर्मीहरूले यूएन मातहत रहेर संसारका द्वन्द्वग्रत मुलुकमा पुर्याउँदै आएको शान्ति स्थापनाका बारेमा पनि चर्चा हुनेछ । नेपालले सन् १९५८ देखि विश्वमा शान्ति स्थापनाका लागि योगदान गर्दै आइरहेको छ । नेपाल अहिले संख्याको हिसाबमा सबैभन्दा बढी शान्ति सैनिक पठाउने मुलुकमा विश्वमै दोस्रो नम्बरमा रहेको छ । 

महासचिव गुटेरेसलाई नेपाली शान्ति सैनिकको सम्बन्धमा पनि नेपाल भ्रमणमा जानकारी गराइनेछ । त्यसले नेपालले आगामी दिनमा थप शान्ति सैनिक पठाउन र यूएनका माथिल्लो तहमा पनि नेपाली पदाधिकारीहरूलाई पुग्नका लागि सहज हुनेछ ।