राष्ट्रसंघका महासचिव गुटरेससँग भेटवार्ता गरेका परराष्ट्रमन्त्री एनपी साउद आजै अमेरिका जाँदै

१२ कात्तिक, काठमाडौं । संयुक्त राष्ट्रसंघ (यूएन) का महासचिव एन्टोनियो गुटरेस र परराष्ट्रमन्त्री एनपी साउदबीच भेटवार्ता भएको छ ।  चारदिने औपचारिक भ्रमणका लागि नेपाल आएका गुटरेस र मन्त्री साउदबीच आइतबार भेटवार्ता भएको हो ।  
 
गुटरेस र परराष्ट्रमन्त्री साउदबीच सिंहदरवारस्थित परराष्ट्रमन्त्रालयमा आइतबार दिउँसो भेटवार्ता भएको हो । परराष्ट्रमन्त्रीसँगका भेटजवार्तापछि आजै प्रधानमन्त्री पुष्पकमल दाहाल प्रचण्डसँग पनि सिंहदरवारमै महासचिव गुटरेसले भेटवार्ता गर्दैछन् । 
 
प्रधानमन्त्रीसँगको भेटवार्तापछि महाहसचिव गुटरेसले आइतबार अपराह्न चार बजे राष्ट्रपति रामचन्द्र पौडेलसँग शीतलनिवासमा भेटवार्ता गर्ने कार्यतालिका रहेको परराष्ट्र मन्त्रालयले जनाएको छ । मन्त्रालयका अनुसार गुटरेसले नेपाली कांग्रेसका सभापति शेरबहादुर देउवा र नेकपा (एमाले) का अध्यक्ष केपी शर्मा ओलीसँग सङ्घीय संसद् भवन नयाँ बानेश्वरमा बेग्लाबेग्लै शिष्टाचार भेट गर्ने कार्यतालिका छ ।

भेटवार्तापछि महासचिव गुटरेसले ऐतिहासिक एवं पुरातात्विक महत्वको सम्पदास्थल पाटन दरबार क्षेत्रको आइतबार अवलोकन गर्ने कार्यक्रम छ ।  प्रधानमन्त्री प्रचण्डले महासचिव गुटरेसको सम्मानमा आझ साँझ सांस्कृतिक कार्यक्रमसहितको रात्रिभोजको आयोजना गरेका छन् ।

यसैबीच परराष्ट्रमन्त्री एनपी साउद आज अमेरिका जाँदै छन् । संयुक्त राष्ट्रसंघका महासचिव एन्टोनियो गुटेरेससँगको भेटवार्ता सकिएपछि उनी अमेरिका प्रस्थान गर्ने भएका हुन् । भ्रमणका क्रममा परराष्ट्रमन्त्री साउदले यही अक्टोबर ३० मा अमेरिकी विदेशमन्त्री एन्टोनी जे ब्लिन्केनसँग वासिङटन डीसीमा द्विपक्षीय भेटवार्ता गर्ने कार्यक्रम छ ।

परराष्ट्र मन्त्रालयका अनुसार भ्रमणमा परराष्ट्रमन्त्री साउदले अन्तर्राष्ट्रिय विकासका निमित अमेरिकी नियोग (यूएसएआईडी)की प्रशासक सामन्था पावर, मिलेनियम च्यालेन्ज कर्पोरेसनकी प्रमुख कार्यकारी अधिकृत एलिस पी. अल्ब्राइट र अमेरिकी सरकारका अरू उच्चस्तरीय अधिकारीहरूसँग पनि भेटवार्ता गर्ने कार्यक्रम छ ।

अमेरिकामा रहँदा उनी युनाइटेड स्टेट्स इन्स्टिच्युट अफ पिस (यूएसआईपी)मा आयोजना गरिने अन्तरक्रिया कार्यक्रम, नेपाली–अमेरिकी व्यवसायी समुदायसँग अन्तरक्रिया, गैरआवासीय नेपाली संघका प्रतिनिधि र नेपाली–अमेरिकी व्यवसायीसँगको अन्तरक्रियामा सहभागी हुनेछन् ।