तीन महिनामा ३ खर्ब ६६ अर्ब पुग्यो व्यापार घाटाः ४ खर्ब ७ अर्बको आयात, ४० अर्ब ७५ करोडको निर्यात

१२ कात्तिक, काठमाडौं । चालु आर्थिक वर्षको तीन महिनामा व्यापार घाटा ३ खर्ब ६६ अर्ब पुगेको छ । भन्सार विभागका अनुसार गत आर्थिक वर्षको सोही अवधिको तुलनामा २.१५ प्रतिशतले बढी हो । गत आर्थिक वर्षको पहिलो तीन महिनामा व्यापार घाटा ३ खर्ब ५९ अर्ब १७ करोड रुपैयाँ थियो । 
 
चालु आर्थिक वर्षको तेस्रो महिनासम्ममा मुलुकले ४ खर्ब ७ अर्ब ७५ करोड ८९ लाख बराबरको माल वस्तुको आयात गरेको छ । गत आर्थिक वर्षको सोही अवधिमा चार खर्ब ९९ करोड बराबरको वस्तु आयात भएको छ । गत आवको तेस्रो महिनाको तुलनामा चालु आवको तेस्रो महिनासम्म कूल आयात एक दशमलव ६९ प्रतिशतले बढेको छ ।

भन्सार विभागले आज सार्वजनिक गरेको गत असोज मसान्तसम्मको विवरणअनुसार तीन महिनाको अवधिमा नेपालको निर्यात भने दुई दशमलव २६ प्रतिशतले ओरालो लागेको छ । विभागका अनुसार सो अवधिमा नेपालबाट ४० अर्ब ८७ करोड ४८ लाख बराबरको माल वस्तु निर्यात भएको छ । गत वर्षको तीन महिनाको अवधिमा ४१ अर्ब ८२ करोड बराबरको निर्यात भएको थियो ।

सो अवधिमा नेपालको वैदेशिक व्यापार रु चार खर्ब ४८ अर्ब ६३ करोड बराबरको वैदेशिक व्यापार भएको छ । गत वर्षको यही अवधिमा रु चार खर्ब ४२ अर्ब ८१ करोड बराबरको वैदेशिक व्यापार भएको थियो । विभागका अनुसार असोज मसान्तसम्म नेपालको व्यापार घाटा तीन  खर्ब ६६ अर्ब ८८ करोड बराबर रहेको छ । गत वर्षको सोही अवधिमा रु तीन खर्ब ५९ अर्ब १७ करोड बराबरको व्यापार घाटा भएको थियो ।  

चालु आर्थिक वर्षको साउन, भदौ र असोजमा ४ खर्ब ७ अर्ब ७५ करोड रुपैयाँको वस्तु आयात भएको छ । गत वर्ष सोही अवधिमा ४ खर्ब ९९ करोडको वस्तु आयात गरिएको थियो । आयात १.६९ प्रतिशतले बढे पनि निर्यात भने २.२६ प्रतिशतले घटेको छ ।

गत आर्थिक वर्षको साउन, भदौ र असोजमा ४१ अर्ब ८२ करोड रुपैयाँको वस्तु निर्यात हुँदा चालु आर्थिक वर्षको सोही अवधिमा ४० अर्ब ८७ करोडको वस्तु निर्यात भएको भन्सार विभागको तथ्यांक छ ।

चालु आर्थिक वर्षको तीन महिनामा सबैभन्दा बढी २९ अर्ब रुपैयाँको डिजेल, १७ अर्बको पेट्रोल, ११ अर्बको एलपीजी ग्यास आयात भएको विभागले जनाएको छ । चालु आर्थिक वर्षको तीन महिनामा सबैभन्दा बढी २ अर्बको गलैंचा, १ अर्बको फलामजन्य वस्तु, १ अर्बको अलैंची निर्यात भएको छ ।

चालु आर्थिक वर्षको तीन महिनमा साढे ११ अर्ब रुपैयाँबराबरको खाना पकाउने ग्यास आयात गरिएको छ । भन्सार विभागको तथ्यांकानुसार चालु आवको साउन, भदौ र असोजमा ११ अर्ब ६२ करोड ७१ लाख ६३ हजार रुपैयाँबराबरको ग्यास आयात गरिएको हो । 

यो अवधिमा १३ करोड २५ लाख ७७ हजार ६८६ किलोग्राम एलपीजी ग्यास आयात गरिएको छ । त्यसबापत सरकारले दुई अर्ब १६ करोड ९० लाख ८२ हजार रुपैयाँ राजस्व संकलन गरेको छ । चालू आर्थिक वर्षको तीन महिनाको अवधिमा अर्थ मन्त्रालयले १ खर्ब ४५ अर्ब ८ करोड रुपैयाँ भन्सार राजश्व संकलनको लक्ष्य पाएको थियो । 

अर्थ मन्त्रालयले प्रत्येक महिनाको भन्सार राजश्व संकलन लक्ष्य तय गर्दा असोज महिनासम्ममा उक्त परिणामको राजश्व संकलनको लक्ष्य लिएको थियो । तर, यस अवधिसम्ममा लक्ष्यको ७४.९५ प्रतिशत मात्रै राजश्व सङ्कलन भएको भन्सार विभागले जनाएको छ ।

असोज महिनासम्मको अवधिमा विभागले १ खर्ब ८ अर्ब ७५ करोड रुपैयाँ राजश्व संकलन गरेको छ । यो लक्ष्यको करिब ७५ प्रतिशत हो । आयात खुम्चिँदै जाँदा राजश्व संकलनको लक्ष्य प्रभावित परेको थियो । ‘अघिल्लो वर्षको दसैँ असोज महिनामा परेको थियो । जसकारण, भदौ महिनामै आयात भएको थिया । यो वर्ष असोजमा बजार पूर्ण चहलपलह रह्यो । सोही कारण आयातमा सामान्य वृद्धि भएको हुन सक्छ ।’

महालेखा नियन्त्रकको कार्यालयका अनुसार चालू आर्थिक वर्षको कात्तिक १२ गतेसम्मको अवधिमा २ खर्ब ४४ अर्ब ६३ करोड रुपैयाँ राजश्व संकलन भएको छ । यो लक्ष्यको १६ प्रतिशत हो । चालू आर्थिक वर्षमा राज्यले कूल १४ खर्ब ७२ अर्ब राजश्व (कर, अनुदान र अन्य आम्दानी) संकलनको लक्ष्य लिएको थियो । चालू आर्थिक वर्षलाई विनियोजित १७ खर्ब ५१ अर्ब ३१ करोडको बजेट मध्ये ३ खर्ब २ अर्ब ६९ करोड रुपैयाँ खर्च भइसकेको छ ।