हाम्रो अर्थतन्त्र सकारात्मक दिशामा छ, आर्थिक गोलमेचपछि एउटा निचोडमा पुगिन्छः प्रधानमन्त्री

२५ कात्तिक, काठमाडौं । प्रधानमन्त्री पुष्पकमल दाहाल प्रचण्डले नेपालको अर्थतन्त्र सकारात्मक दिशामा अगाडि बढिरहेको बताएका छन् । उनले नेपाल श्रीलंका बन्छ भन्नेहरू पनि अर्थतन्त्रमा आएको सुधार देखेर दंग परेको बताएका छन् । सुधार उन्मुख रहेको अर्थतन्त्रलाई थप मजबुत बनाउन तिहारपछि हुने आर्थिक गोलमेचबाट एउटा निचोड आउने बताए । 

शनिबार कीर्तिपुरमा गरिएको पार्टीको कार्यक्रममा बोल्दै प्रचण्डले आर्थिक समृद्धिका लागि सरकारले लगातार प्रयत्न गरेको बताए । मौद्रिक नीति र वित्तीय नीति सुधार गर्नका लागि, बैंकको ब्याजदर घटाउनका निम्ति, जग्गाको कारोबार बढाउन कित्ताकाट खुलाउनका निम्ति, अर्थतन्त्रलाई चलायमान बनाउनका निम्ति धेरै मिहिनेत गरिएको उनको भनाइ छ । 

अझै भनेजस्तो परिणाम आएको छैन तर केही सुधार भएको छ । पहिले भनेजस्तो नेपाल अब श्रीलंका नै हुन्छ भन्ने अब त्यस्तो आतंक छैन । श्रीलंका हुन्छ भनेर सधैं विरोधमा लागिरहेकाहरु पनि सुधार देखेर दंग परेका छन् । अहिले राजश्व पनि बृद्धि हुन थालेको छ, इतिहासमै बढी पर्यटक एकै महिनामा भित्रिएका छन् । रेकर्ड बढेको छ, रेमिट्यान्स बढेको छ । अहिले विदेशी मुद्राको सञ्चित अत्यन्त उत्साहप्रद छ, उनले भने । 

प्रधानमन्त्री प्रचण्डले अहिले आर्थिक संकट समाधानका लागि आफूले तिहार लगतै वृहत् भेलाको आयोजना गर्न लागेको र त्यसबाट अर्थतन्त्रमा गुणात्मक पहल गर्न आउने नीति तथा कार्यक्रममा समावेश गरेर जाने बताए ।  उनले सरकारले गरेका राम काम जनतामा पुर्याउन आग्रह गर्दै २०८४ मा २०६४ कै जस्तो माओवादी बनाउने गरी अगाडि बढ्न आग्रह गरे ।

 प्रधानमन्त्रीले २०८४ को निर्वाचनमा जनताको विश्वास जितेर ०६४ कै सरह सरकारको नेतृत्व गर्ने दाबी गरे । २०६४ कै स्थितिमा फर्किन नसकेपनि सो सरह जनताको मन जितेर सरकारको नेतृत्व गर्नुपर्ने आवश्यकता औंल्याए ।

सरकारबाट पनि नयाँ आन्दोलनको सुरुवात गरेको र अझै नयाँ आन्दोलनको सुरुवात गर्ने उनको भनाइ थियो । प्रधानमन्त्री कहिलेसम्म रहने भन्ने कुरा मुख्य कुरा नभएको तर जनताको पक्षमा सुशासन, सामाजिक न्याय र समृद्धिको कुरा आफ्ना लागि मुख्य कुरा रहेको प्रधानमन्त्री प्रचण्डले दाबी गरे ।

‘२०६४ एउटा स्थिति थियो, हामी २०६४ मै त फर्किन सक्दैनौँ । अब आउने भनेको ६४ होइन, २०८४ हो । २०८४ मा हामी ०६४ जस्तै जनताको पक्षमा, जनताको विश्वास लिन सक्छौँ कि सक्दैनौँ । हामीले सरकारबाट पनि नयाँ आन्दोलनको सुरुवात गरेका छौँ । अझै गर्छौँ । कति दिन सरकार रहन्छ, प्रधानमन्त्री रहन्छु, मुख्यमन्त्री हुन्छु, त्यो मुख्य कुरा होइन । मुख्य कुरा जनताको पक्षमा सुशासन, सामाजिक न्याय र समृद्धिको हो । हामीले कति राम्रो कुरा सुरु गर्छौं त्यो मुख्य कुरा हो,’ उनले भने ।

पछिल्लो समय अर्थतन्त्रमा केही सुधार हुँदै गएको समेत उनको भनाइ छ । राजश्व वृद्धि, पर्यटकमा वृद्धि र रेमिट्यान्स उत्साहजनक हुनुले अर्थतन्त्र सुधार भइरहेको बताए  । उनले विदेशी मुद्राको सञ्चितिको स्थिति उत्साहजनक रहेको उनले बताए ।

’अर्थतन्त्रमा केही सुधार भएको छ । राजश्व पनि वृद्धि हुन थालेको छ । पर्यटक त इतिहासमै सबैभन्दा बढी भित्रिएका छन् । रेमिट्यान्स धेरै नै बढेको छ । विदेशी मुद्राको सञ्चितिको स्थिति उल्लेख्य र उत्साहजनक छ । अर्थतन्त्रको समस्या समाधानका लागि तिहारपछि नै भेला गर्दैछु,’ उनले भने । प्रधानमन्त्री दाहालले सरकारलाई ढाल्न विभिन्न प्रतिक्रियावादीहरु सक्रिय भएको समेत बताए ।