फाइनलका लागि दक्षिण अफ्रिका र अस्ट्रेलिया भिड्दै

३० कात्तिक, काठमाडौं । विश्वकप क्रिकेटको दोस्रो सेमिफाइनलमा बिहीबार दक्षिण अफ्रिका र अस्ट्रेलियाबीच प्रतिस्पर्धा हुँदै छ । कोलकातास्थित इडेन गार्डेनमा नेपाली समयअनुसार दिउँसो सवा २ बजे दुई टिमबीचको खेल सुरु हुनेछ । 

यसअघि बुधबार भएको पहिलो सेमिफाइनलमा न्युजिल्यान्डलाई ७० रनले हराउँदै भारत फाइनलमा प्रवेश गरिसकेको छ । समूह चरणमा दोस्रो र तेस्रो स्थान हात पार्दै दक्षिण अफ्रिका र अस्ट्रेलियाले सेमिफाइनल यात्रा तय गरेका हुन् ।

दुवै टिमले समूह चरणका ९ खेलमध्ये ७÷७ खेलमा जित हात पारेका थिए । समूह चरणको खेलमा दक्षिण अफ्रिकाले अस्ट्रेलियालाई १३४ रनले हराएको थियो । ३१२ रनको लक्ष्य पछ्याएको अस्ट्रेलिया ४०.५ ओभरमा सबै विकेट गुमाउँदै १७७ रन मात्र जोड्न सफल भएको थियो ।

विश्वकप प्रतियोगिताकै कुरा गर्द दुई टिम अहिलेसम्म ७ पटक आमनेसामने हुँदा ३÷३ खेल जितेका छन् भने एक पटक बराबर भएको छ । तर सन् १९९९ र २००७ को सेमिफाइनलमा भने अस्ट्रेलियाले दक्षिण अफ्रिकालाई हराएको थियो र दुवैपल्ट उपाधिसमेत जितेको थियो । सबै एकदिवसीय खेलमा भने दक्षिण अफ्रिका ५५ र अस्ट्रेलिया ५० खेलमा विजयी भएको अवस्था छ । अस्ट्रेलियाका ग्लेन म्याक्सवेल दक्षिण अफ्रिकाका लागि टाउको दुखाइ बन्न सक्छन् ।

म्याक्सवेलले यही विश्वकपको समूह चरणको खेलमा अफगानिस्ताविरुद्ध २०१ रन बनाएका थिए । १ सय २८ बलको सामना गरेका उनले २१ चौका र १० छक्का प्रहार गरेका थिए । एकदिवसीय खेलमा ४ हजार रनको नजिक पुगेका म्याक्सवेल र ७ हजार रनको नजिक पुगेका डेभिड वार्नरलगायतका अस्ट्रेलियन खेलाडी पछिल्लो समय फर्ममा रहेका छन् । त्यस्तै बलर एडम जम्पासमेत फर्ममा रहेका छन् ।