बन्द गर्नुपर्ने कारण माग गर्दै टिकटकले नेपाललाई पठायो पत्र, २९ लाख ८० हजार भिडिओ हटाएको दावी

१ मंसिर, काठमाडौं । टिकटकको मुख्यालयले बन्द गर्नुपर्ने कारण खुलाउन माग गर्दै नेपाल दूरसञ्चार प्राधिकरणमार्फत नेपाल सरकारलाई पत्र पठाएको छ । उसले टिकटकमाथि प्रतिबन्ध लगाउने निर्णय नेपाल सरकारसँगको सहकार्य विपरीत भएको बताएको छ । 

नेपाल दूरसञ्चार प्राधिकरणका अनुसार टिकटक मुख्यालयले टिकटक प्रयोगकर्ताको सुरक्षा सुनिश्चित गर्न संवादका लागि सहकार्य गर्न प्रतिबद्ध रहेको बताएको छ । टिकटकमाथि प्रतिबन्ध लगाउने नेपाल सरकारको निर्णय अस्पष्ट भएकाले स्पष्ट कारण खुलाउन आग्रह गरिएको छ । 

टिकटकले आफूहरूले नियमित रूपमा मापदण्ड बाहिरका भिडियोहरु हटाइरहेको जनाएको छ । टिकटकले सुरक्षा चुनौतीलाई सम्बोधन गर्न प्रयास गरिरहेको र थप गर्नुपर्ने कार्यका लागि पनि तयार रहेको जनाएको छ । उसले अक्टोबर २०२२ देखि जुन २०२३ सम्मको अवधिमा कम्युनिटी गाइडलाइन विपरित कार्य गर्ने नेपाली प्रयोगकर्ताका २९ लाख ८० हजार भिडिओ हटाएको दावी गरेको प्राधिकरणले जनाएको छ ।