रेट्रो फिटिंग गरेको नयाँ कार्यालयमा सरे प्रधानमन्त्री

६ मंसिर, काठमाडौं । प्रधानमन्त्री पुष्पकमल दाहाल प्रचण्डले आफ्नो कार्यालय सारेका छन् । उनी सिंहदरबारको पश्चिम तर्फको रेट्रो फिटिंग भएको भागमा बनाइएको कार्यालयमा सरेका हुन् । 

०७२ सालमा गएको भूकम्पबाट क्षति भएको संरचनालाई रेट्रो फिटिंग गरेर अहिले प्रधानमन्त्री त्यही कार्यालयमा सरेका हुन् । भूकम्पबाट क्षति भएको १२० वर्ष पुरानो भवनको मूल संरचनालाई कायमै राखेर पुनर्निर्माण गरिएको हो । उनले पहिले बस्दै गरेको ठाउँ साघुरो भएकाले यो ठूलो स्पेस र फराकिलो भएकाले सरेको बताए । 

उनले पुनर्निर्माणलाई सक्न निरन्तर काम गर्ने सहरी विकास मन्त्रालय र सहयोग गर्ने सबैप्रति आभार व्यक्त गरे । उनले भने– मलाई कता कता अहिले बसेको ठाउँमा बस्दा गुम्म परेको जस्तो, फ्रेस नहुनेजस्तो लाग्थ्यो । यो ठाउँमा आएपछि सबैतिर देखिने, स्पेसपनि ठूलो सबै कारणले अलि बढी फुर्छ होला दिमाग चाहिँ भन्ने मैले महशुस गरेको छु ।