दक्षिण एसियाली कराँतेमा २९ स्वर्ण जितेर नेपाल पहिलो

१८ मंसिर, काठमाडौं । नेपालले सातौँ दक्षिण एसियाली कराँते च्याम्पियनसिपमा सर्वाधिक २९ स्वर्णपदकसहित शीर्ष स्थान हासिल गरेको छ । नेपालले २६ रजत र ६ कास्यपदक पनि जितेको छ । 

त्रिपुरेश्वरस्थित कभर्डहलमा भएको दुईदिने प्रतियोगितामा भारत २५ स्वर्ण, २२ रजत र १७ कास्यसाथ दोस्रो भयो । नेपाल कराँते महासंघद्वारा आयोजित प्रतियोगितामा तेस्रो स्थानको बंगलादेशले ६ स्वर्ण, सात रजत र १४ कास्य जित्यो ।

चार स्वर्ण, एक रजत र १९ कास्यसाथ पाकिस्तान चौथो, दुई स्वर्ण, आठ रजत र २९ कास्यसाथ श्रीलंका (एनओसी) टिम पाँचौँ र दुई कास्यसाथ भुटान छैटौँ भयो ।

शनिबार र आइतबार भएको प्रतियोगितामा नेपाल, भारत, बंगलादेश, पाकिस्तान, श्रीलंका (एनओसी टिम) र भुटान गरी ६ राष्ट्रका १०३ महिला र १३४ पुरुष खेलाडी सहभागी थिए ।