एमालेको क्रियाशील सदस्य भएको आरोपमा बीर अस्पतालबाट हटाइएका पौडेलले सर्वोच्चमा दिए निवेदन

१८ मंसिर, काठमाडौं । वीर अस्पतालको निर्देशकबाट हटाइएका डा. सन्तोष पौडेल कानुनी उपचारका लागि सर्वोच्च अदालतमा निवेदन दिएका छन् ।  डा. पौडेलले आफूलाई स्वास्थ्य तथा जनसंख्या मन्त्रालयले हटाउन गरेको निर्णयविरूद्ध सर्वोच्चमा सोमबार मुद्दा दायर गरेका हुन् । 

सर्वोच्चले उनको मुद्दामा मंसिर २० गतेका लागि पेसी तोकेको छ । डा. पौडेलले आफ्नो कार्यकालको पुरा अवधि काम गर्न पाउँ भन्दै सर्वोच्चमा मुद्दा दर्ता गराएका छन् । उनी २०७९ फागुनमा दुई वर्षे कार्यकालका लागि वीरको निर्देशक नियुक्त भएका थिए ।  

डा. पौडेल नेकपा एमालेको सदस्य र जनसंगठनका महासचिव पदमा क्रियाशील रहेको उजुरी परेको थियो । सोही उजुरी उपर राष्ट्रिय सतर्कता केन्द्रले उनको ट्रेड युनियनसँगको संलग्नता स्वास्थ्य सेवा ऐन, २०५३ दफा ९२ (क) मा भएको व्यवस्था आकर्षित हुने देखिएकाले कानुन बमोजिम कारबाहीका लागि मन्त्रालयलाई सिफारिस गरेको थियो । 

मन्त्रालयले डा. पौडेललाई वीरको निर्देशकको पदीय जिम्मेवारीमा नरहने भन्दै अर्को निर्णय नहुन्जेलसम्म मंसिर १५ गतेदेखि मन्त्रालयमा उपस्थित हुन पत्राचार गरेको थियो । यसपछि उनी उपचार खोज्दै सर्वोच्च अदालत पुगेका हुन् ।