निर्वाचन आयोगमा दल दर्ताको क्रम जारी, पाँच दलले दिए निवेदन

२५ मंसिर, काठमाडौं । रिक्त हुने राष्ट्रियसभा सदस्य पदको निर्वाचनका लागि अहिलेसम्म पाँच राजनीतिक दलले, दल दर्ताको निवेदन दिएका छन् । दर्ताका निम्ति आह्वान गरिएको दोस्रो दिन सोमबार दिउँसोसम्म पाँच दलले निवेदन दिएको निर्वाचन आयोगले जानकारी दिएको छ । 

माघ ११ गते हुने राष्ट्रियसभा निर्वाचनका लाागि सोमबार दिउँसोसम्म पाँचवटा राजनीतिक दलले दल दर्ताको निवेदन दिएका हुन् । निर्वाचन आयोगका अनुसार नेकपा एमाले, नेकपा माओवादी केन्द्र, राष्ट्रिय प्रजातन्त्र पार्टी (राप्रपा), जनमत, नेपाल मजदूर किसान पार्टीले आयोगमा निवेदन दिएका हुन् ।  

नेपाली कांग्रेस, जसपा र लोसपा लगायतका दलले निवेदन दिन बाँकी छ । आगामी माघ ११ गते हुने निर्वाचनका लागि आइतबारबाट दल दर्ताका लागि आयोगले सुचना जारी गरेको थियो । दल दर्ताका मंसिर २९  गतेसम्मका लागि समय दिएको आयोगले जनाएको छ । आगामी फागुन २० गतेबाट रिक्त हुने राष्ट्रियसभाको २० पदमध्ये माघ ११ गते १९ पदमा चुनाव हुदैछ ।