एक अर्बभन्दा बढी बक्यौता रहेका जगदम्बासहित चार ठूला उद्योगको काटियो विद्युत लाइन

६ पुस, काठमाडौं । नेपाल विद्युत प्राधिकरणले बक्यौता नतिर्ने ४ उद्योगको लाइन काटेको छ । प्राधिकरणले जगदम्बा स्टिल, अर्घाखाँची सिमेन्ट, घोराही सिमेन्ट र रिलायन्स स्पिनिङ मिल्सको लाइन काटेको हो । शुक्रबार अबेर ति उद्योगको लाई काटिएको प्राधिकरणले जनाएको छ । 

यी चार वटा कम्पनीको बक्यौता १ अर्बभन्दा बढी छ । १ अर्बभन्दा बढी बक्यौता रहेका कम्पनीको लाइन आजबाट काट्न सुरु गरिएको प्राधिकरणको भनाई छ । शिवम सिमेन्टको भने लाइन काटिएको छैन । यो उद्योग यसै विषयमा अदालत गएको थियो । प्रधानमन्त्रीको निर्देशनअनुसार अर्बमाथि बक्यौता अरू उद्योगको लाइन आइतबार काटिनेछ । 

प्राधिकरणका अनुसार सबैभन्दा बढी बक्यौता जगदम्बा स्टिलको छ । जसको ४ अर्ब ३ करोड बक्यौता छ । जगदम्बा मुलुककै सबैभन्दा ठूलो स्टिल उद्योग हो । शिवम सिमेन्टको २ अर्ब ३० करोड, रिलायन्स स्पिनिङ मिल्सको १ अर्ब ८७ करोड, घोराही सिमेन्ट उद्योगको १ अर्ब ३५ करोड, अर्घाखाँची सिमेन्ट उद्योगको १ अर्ब २६ करोड बक्यौता छ ।

६१ वटा कम्पनीले ट्रंक र डेडिकेटेड लाइनको सुविधा लिएर बक्यौता तिरेका छैनन् । जसको कुल बक्यौता २५ अर्ब रहेको छ ।