ऐनमा बाझिने गरी वालिङका सामूदायिक विद्यालय वडा अध्यक्षलाई दिने तयारी

४ माघ, स्याङजा । वालिङ नगरपालिका भित्रका सबै सामुदायिक विद्यालयमा व्यवस्थापन समिति गठन मिति तोकिएको छ । नगरका कूल ७२ विद्यालयहरूमा आगामी माघ १० गतेका लागि विद्यालय व्यवस्थापन समिति गठन गर्न/गराउन वालिङ नगरपालिकाका प्रमुख कृष्ण खाँणद्वारा जारी विज्ञप्तिमा उल्लेख गरिएको छ ।

गत पुस २८ सम्पन्न वालिङ नगरपालिकाको १५ औं नगर सभाद्वारा संशोधित वालिङ नगरपालिकाको स्थानीय शिक्षा (दोस्रो संशोधन) ऐन, २०८० अनुसार नयाँ व्यवस्थापन समिति गठन प्रमुख खाँणद्वारा जारी विज्ञप्तिमा भनिएको छ । वर्तमान व्यवस्थापन समितिको कार्यअवधि आगामी माघ ९ गते सकिने उल्लेख गर्दै नगरभित्रका सम्पूर्ण विद्यालयहरूमा एकैदिन अर्थात् माघ १० मा व्यवस्थापन समिति गठन गर्न निर्देशन दिइएको छ ।

भर्खरै संशोधित ऐनको उपदफा १ को ‘ग’मा विद्यालय रहेको सम्बन्धित वडाका जनप्रतिनिधिहरू मध्येबाट माध्यमिक तहमा वडा अध्यक्ष र आधारभूत विद्यालयमा वडा कार्यसमितिले तोकेको जनप्रतिनिधि व्यवस्थापन समितिको अध्यक्ष रहने उल्लेख गरिएको छ । तर काबु बाहिरको परिस्थिति उत्पन्न भई विद्यालय व्यवस्थापन समितिका अध्यक्ष रिक्त हुन आएमा नगरप्रमुखको परामर्शमा वडा कार्यसमितिले तोकेको जनप्रतिनिधि विद्यालय व्यवस्थापन समितिको अध्यक्ष हुनेछ । 

त्यसै गरी उपदफा २ मा माध्यमिक तह वा उपल्लो तह लागि विद्यालय व्यवस्थापन समितिमा रहन एस.एल.सी वा सो सरहको योग्यता हुनुपर्नेछ । तर, निर्वाचित स्थानीय जनप्रतिनिधिहरूको हकमा यो दफा लागु हुनेछैन ऐनमा उल्लेख गरिएको छ । 

यता संघीय सरकारले सामुदायिक र सार्वजनिक शैक्षिक गुठी अन्तर्गत सञ्चालित विद्यालयको गठन, काम, कर्तव्य र अधिकारबारे अभिभावकले आफूमध्येबाट छानी पठाएका दुई जना महिलाहरूसहित चार जना सदस्य, विद्यालय रहेको सम्बन्धित वडाको वडा अध्यक्ष वा वडा समिति सदस्यहरू मध्येबाट सो वडा समितिले मनोनयन गरेका सदस्य, र विद्यालयका संस्थापक, स्थानीय बुद्धिजीवी, शिक्षाप्रेमी, विद्यालयलाई निरन्तर सहयोग गर्ने वा १० दश लाख भन्दा बढी नगद वा जिन्सी सहयोगलाई व्यवस्थापन सदस्य बन्न सक्ने उल्लेख गरिएको छ । विद्यालयका शिक्षकहरूबाट छानी पठाएको मध्येबाट एक जना र विद्यालयका प्रधानाध्यापक सदस्य सचिव रहने गरी व्यवस्थापन समिति गठन गर्न सकिने उल्लेख गरिएको छ ।

नगर प्रमुख कृष्ण खाँण दुई तिहाइ बहुमतले पारित ऐन कार्यान्वयन हुनेमा विश्वस्त छन् । उनले स्थानीय सरकार स्वायत्त संगठन भएकाले सरकार सञ्चालनका लागि आवश्यक ऐन नियम र कार्यविधि आफै तयार गरिने बताए । नगर प्रमुख खाँणले भने, ‘जनताबाट प्रत्यक्ष निर्वाचित जनप्रतिनिधिले बनाएको ऐनको कार्यान्वयन हुनेमा ढुक्क छु । जनताकै लागि आवश्यक ठानेर ऐन संशोधन गरिएको हो ।’ संघीय सरकारसँग बाझिने बारे प्रश्न गर्दा त्यसको अन्तिम फैसला अदालतको रहेको बताए । 

उपप्रमुख तिवारीद्वारा विरोध
१५ औं नगर सभाद्वारा संशोधित वालिङ नगरपालिकाको स्थानीय शिक्षा (दोस्रो संशोधन) ऐन, २०८० लाई नगर उपप्रमुख कविता तिवारीद्वारा विरोध गर्दै आएकी छन् । उपप्रमुख तिवारीको नेतृत्वमा नगरसभा बहिष्कार गरेका थिए । उपप्रमुख सहित १५ जनाद्वारा विज्ञप्ति मार्फत बहिष्कार गरेको जानकारी गराइएको थियो ।

संशोधित ऐनलाई लिएर कुटाकुट
भर्खरै सम्पन्न नगर सभाद्वारा दुई तिहाइ बहुमतले पारित ऐनबारे नगरपालिकाको कार्यालय परिसरभित्र कार्यपालिका सदस्यबीच कुटाकुट भएको थियो । वडा नम्बर १० का वडा अध्यक्षले वडा नम्बर ५ बाट निर्वाचित वडा सदस्यलाई नगर परिसरमा कुटपिट गरेका हुन् । कुटपिटबारे नेपाली कांग्रेस नगर समितिको पटक पटक बैठक बसेको थियो ।

विभिन्न राजनीतिक दल, संगठन र व्यक्तिहरूको विरोध
संशोधित ऐनले वालिङको राजनीतिक माहोल तातिएको छ । ऐनबारे एक विज्ञप्ति निकाल्दै राष्ट्रिय स्वतन्त्र पार्टी वालिङ नगर समितिले नगरपालिकाको ध्यानाकर्षण गराएको छ । कांग्रेस निकट मानिने नेपाल शिक्षक संघ वालिङ नगर कार्यसमिति एक विज्ञप्ति जारी गर्दै नगरपालिकाको ध्यानाकर्षण गराएको छ । यस्तै नगर शिक्षा समितिका सदस्य द्वय जीवलाल काफ्ले र यमकान्त खनालले शिक्षा ऐन २०८० को खुलेरै विरोध गरेका छन् । काफ्ले रणवीर जनहित माध्यमिक विद्यालय वालिङ १ खहरेका व्यवस्थापन समितिका अध्यक्ष हुन् ।

उता नेकपा (एमाले) र शिक्षक संगठनले भने संशोधित ऐनबारे कुनै आधिकारिक धारण व्यक्त गरेका छैनन् । एमालेबाट निर्वाचित नगर प्रमुख हुँदा एमाले र तिनका भातृसंगठनलाई खुलेर विरोध गर्न सकिरहेको छैन । 

यस्तो छ नजिर 
सम्बन्धित वडाका वडा अध्यक्षलाई विद्यालयका व्यवस्थापन समिति बनाउने ऐन निर्माण गर्ने पालिका वालिङ दोस्रो हो । यसअघि काठमाडौं महानगरपालिकाले वडा अध्यक्षहरुलाई सम्बन्धित विद्यालयका व्यवस्थापन समितिका अध्यक्ष बनाउने कार्यपालिकाद्वारा गरिएको निर्णयलाई सर्वोच्च अदालत बदर गरिदिएको थियो ।महानगरले कानुनको पालना गर्ने भन्दै आफ्नो निर्णयबाट पछि हटेको थियो । 

वालिङमा कक्षा १ देखि सञ्चालित विद्यालय ४८, कक्षा १ देखि ८ सम्म ८ वटा, कक्षा १ देखि १० सम्म ५ वटा र १ देखि १२ सम्म ११ वटा विद्यालय रहेका छन् । जसमा ६ हजार ६ सय ५७ विद्यार्थी अध्ययनरत छन् । 
 

यो पनि पढ्नुहोस