राष्ट्रिय सभा निर्वाचनमा ९९ प्रतिशत खस्यो मत, कुन प्रदेशमा कति ?

काठमाडौं, ११ माघ । राष्ट्रिय सभाका १९ सिटका लागि बिहिबार भएकाे मतदानमा ९९.३२ प्रतिशत मत खसेको छ।

बिहान ९ बजेदेखि दिउँसो ३ बजेसम्म सातै प्रदेशका राजधानीमा सम्पन्न निर्वाचन शान्तिपूर्ण रुपले सम्पन्न भएकाे निर्वाचन आयाेगले जनाएकाे छ ।

निर्वाचन आयाेगका अनुसार कोशी प्रदेशमा ९९.२७ प्रतिशत, मधेसमा ९९.७३, बागमतीमा ९८.५६, गण्डकीमा ९९.५७, लुम्बिनीमा ९९.३४, कर्णालीमा एक सय प्रतिशत र सुदूर पश्चिममा ९८.६८ प्रतिशत मत खसेको आयोगका सहसचिव एवं प्रवक्ता शालिग्राम शर्मा पौडेलले बताए।

उनले सबै प्रदेशमा रहेका २०४६ मतदातामध्ये २०३२ जनाले मतदान गरेको जानकारी दिए। १९ सिटका लागि भएको निर्वाचनमा ५१ जनाले उम्मेदवारी दर्ता गराएका थिए।

बिहिबार सम्पन्न निर्वाचनमा सत्ता गठबन्धनका १८ उम्मेदवार र एमालेकी एक उम्मेदवार विजयी भएका छन्।