राष्ट्रिय सभामा निर्वाचित भएपछि सबैभन्दा पहिले कोइराला निवास पुगे सिटौला

१२ माघ, विराटनगर । राष्ट्रिय सभा सदस्यमा निर्वाचित भएपछि नेपाली कांग्रेसका नेता कृष्णप्रसाद सिटौला सबैभन्दा पहिले नेता डा. शेखर कोइरालाकाे निवासमा पुगेका छन् । सिटौला विराटनगरस्थित कोइराला निवास पुगेका हुन् । उनी निर्वाचित भएपछि सबैभन्दा पहिले कोइराला निवास पुगेका हुन् । 

सिटौलालाई राष्ट्रिय सभामा जिताउन शेखर कोइरालाले राम्रै साथ दिएका थिए । निर्वाचन नसकिएसम्म कोइराला विराटनगरमै रहे । कोइराला निवास पुगेको सिटौलालाई शेखरले निर्वाचित भएकोमा बधाई दिए । प्रतिनिधिसभामा दुई पटक पराजित सिटौला कोशीबाट राष्ट्रिय सभामा उम्मेदवार बनेसँगै चर्चामा आएका थिए । 

गठबन्धनमा फ्लोर क्रस हुँदा पनि सिटौलाले एमाले–राप्रपाको गठबन्धनका उम्मेदवार उद्धव पौडेललाई पराजित गरेका छन् । सिटौलालाई राष्ट्रिय सभाको सम्भावित अध्यक्षको रुपमा पनि हेरिएको छ । इतर पक्षको नेतृत्व गरिरहेका कोइरालाले पनि सिटौलालाई राष्ट्रिय सभाको अध्यक्ष बनाउनुपर्ने सार्वजनिक रुपमा बताउँदै आएका छन् । सिटौलाले भने अहिलेसम्म केही बोलेका छैनन् ।