सापटी लगेको पैसा नदिएपछि मन्त्रीविरुद्ध प्रहरीमा उजुरी

१६ माघ, कैलाली । बझाङ बुंगलका धनबहादुर बोहोराले आफूले दिएको सापटी पैसा नदिएर उल्टै धम्की दिएको भन्दै सुदूरपश्चिम प्रदेशका सामाजिक विकासमन्त्री झपट साउदविरुद्ध जिल्ला प्रहरी कार्यालय कैलालीमा उजुरी दिएका छन् । तर, मन्त्री साउदले भने आफूले सापटी नलिएको र ज्यान मार्ने धम्की पनि नदिएको बताएका छन् । 

बझाङका बोहोराले जिल्ला प्रहरी कार्यालय कैलालीमा मन्त्री साउदविरुद्ध उजुरी हालेका हुन् । मन्त्री साउदले आफूले सापटी दिएको पैसा फिर्ता माग्दा ज्यान मार्ने धम्की दिएको भन्दै उजुरी दिएका हुन् । उनले उजुरी दिएपछि प्रहरीले छानविन गर्ने जनाएको छ । 

कैलाली प्रहरी प्रवक्ता डीएसपी कुलदीप चन्दले यस विषयमा थप छानबिन हुने बताए । हामीले यस विषयमा छानबिन गरिरहेका छौँ उनले भने । छानविन पछि मन्त्रीले पैसा लिएर नदिएको वा अरू रिसइबीमा बोहोराले उजुरी दिएको भन्ने पत्ता लाग्ने प्रहरीको भनाइ छ ।